ನಿವಾರ್ ಚಂಡಮಾರುತ: ತಮಿಳುನಾಡಿನಲ್ಲಿ ಲಕ್ಷ ಜನರ ಸ್ಥಳಾಂತರ
ಚಂಡಮಾರುತವು ನವೆಂಬರ್ ೨೬ರ ನಸುಕಿನಲ್ಲಿ ೨ ಗಂಟೆಯ ವೇಳೆಗೆ ನೆಲಕ್ಕೆ ಅಪ್ಪಳಿಸಬಹುದು ಎಂದು ಭಾರತೀಯ ಹವಾಮಾನ ಸಂಸ್ಥೆ ತಿಳಿಸಿದ್ದು, ’ಅತ್ಯಂತ ನಿಕೃಷ್ಟ ಪರಿಸ್ಥಿತಿ ಎದುರಿಸಲು ಸಿದ್ಧತೆ ನಡೆಸಲಾಗುತ್ತಿದೆ’ ಎಂದು ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪಡೆ (ಎನ್‌ಡಿಆರ್‌ಎಫ್) 2020 ನವೆಂಬರ 25ರ ಬುಧವಾರ ಹೇಳಿತು.
ರೈಲ್ವೆಯು ಡಜನ್ ವಿಶೇಷ ರೈಲುಗಳನ್ನು ನವೆಂಬರ್ ೨೫ ಮತ್ತು ೨೬ ರಂದು ರದ್ದುಗೊಳಿಸಿದೆ.
ನಿವಾರ್ ಚಂಡಮಾರುತವು ನವೆಂಬರ್ ೨೬ ರಂದು ಮುಂಜಾನೆ ೨ ಗಂಟೆಯ ನಂತರ ನೆಲಕ್ಕೆ ಅಪ್ಪಳಿಸಬಹುದು ಎಂದು ಎನ್‌ಡಿಆರ್‌ಎಫ್ ಮಹಾನಿರ್ದೇಶಕ ಎಸ್.ಎನ್. ಪ್ರಧಾನ್ ಹೇಳಿದರು.
ನಿವಾರ್ ಚಂಡಮಾರುತದ ಕಾರಣ ಚೆನ್ನೈ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣವು ಬುಧವಾರ ಸಂಜೆ ೭ ರಿಂದ ಗುರುವಾರ ಬೆಳಿಗ್ಗೆ ೭ ರವರೆಗೆ ವಿಮಾನ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಿತು. ನಿವಾರ್ ಚಂಡಮಾರುತದ ತಯಾರಿಗಾಗಿ ತಮಿಳುನಾಡು ಸಾರ್ವಜನಿಕ ರಜಾದಿನವನ್ನು ಘೋಷಿಸಿದೆ
‘ನಿವಾರ್ ಚಂಡಮಾರುತವನ್ನು ಅತ್ಯಂತ ತೀವ್ರ ಎಂಬುದಾಗಿ ವರ್ಗೀಕರಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ನಾವು ಅತ್ಯಂತ ಕೆಟ್ಟ ಪರಿಸ್ಥಿತಿ ಎದುರಿಸಲು ತಯಾರಿ ಮಾಡುತ್ತಿದ್ದೇವೆ. ನಮ್ಮ ತಂಡಗಳು ಕಳೆದ ಎರಡು ದಿನಗಳಿಂದ ಮೈದಾನದಲ್ಲಿವೆ. ಇಲ್ಲಿಯವರೆಗೆ, ತಮಿಳುನಾಡು, ಪುದುಚೇರಿ ಮತ್ತು ಆಂಧ್ರಪ್ರದೇಶದ ಮೂಲಕ ೨೫ ತಂಡಗಳನ್ನು ನಿಯೋಜಿಸಲಾಗಿದೆ’ ಎಂದು ಎನ್‌ಡಿಆರ್‌ಎಫ್ ಮಹಾನಿರ್ದೇಶಕ ಎಸ್.ಎನ್. ಪ್ರಧಾನ್ ಹೇಳಿರುವುದಾಗಿ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
‘೩೦,೦೦೦ ಕ್ಕೂ ಹೆಚ್ಚು ಜನರನ್ನು ತಮಿಳುನಾಡಿನಿಂದ ಮತ್ತು ೭,೦೦೦ ಜನರನ್ನು ಪುದುಚೇರಿಯಿಂದ ಸ್ಥಳಾಂತರಿಸಲಾಗಿದೆ. ಕೇಂದ್ರ, ರಾಜ್ಯ ಮತ್ತು ಸ್ಥಳೀಯ ಸರ್ಕಾರಗಳು ಒಟ್ಟಾಗಿ ಕಾರ್ಯನಿರ್ವಹಿಸುತ್ತಿವೆ. ಹಾನಿಯನ್ನು ಕಡಿಮೆ ಮಾಡಲು ಎಲ್ಲಾ ಪ್ರಯತ್ನಗಳನ್ನು ಮಾಡಲಾಗುತ್ತಿದೆ’ ಎಂದು ಅವರು ಹೇಳಿದರು.
ಪುದುಚೇರಿ ಸರ್ಕಾರವು ಪರಿಸ್ಥಿತಿಯಿಂದ ಉದ್ಭವಿಸುವ ಯಾವುದೇ ಅಗತ್ಯತೆಗಳನ್ನು ಪೂರೈಸಲು ಆಡಳಿತ ಯಂತ್ರೋಪಕರಣಗಳನ್ನು ಸಂಪೂರ್ಣವಾಗಿ ಸಜ್ಜುಗೊಳಿಸಿದೆ ಎಂದು ಅವರು ಹೇಳಿದರು.
ಮಂಗಳವಾರ ರಾತ್ರಿಯಿಂದ, ಚೆನ್ನೈಯಿಂದ ೨೫೦ ಕಿ.ಮೀ ದೂರದಲ್ಲಿರುವ ಕೇಂದ್ರಾಡಳಿತ ಪುದುಚೆರಿಯಲ್ಲಿ ಚಂಡಮಾರುತದ ಪ್ರಭಾವದಿಂದಾಗಿ ಮಳೆಯಾಗುತ್ತಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ತಿಳಿಸಿದೆ.
ಈ ಚಂಡಮಾರುತವು ಬುಧವಾರ ತಡರಾತ್ರಿ ಅಥವಾ ಗುರುವಾರ ಮುಂಜಾನೆ ತಮಿಳುನಾಡಿನ ಮಾಮಲ್ಲಾಪುರಂ ಮತ್ತು ಕಾರೈಕಲ್ ನಡುವೆ ನೆಲಕ್ಕೆ ಅಪ್ಪಳಿಸುವ ನಿರೀಕ್ಷೆಯಿದೆ ಎಂದು ಐಎಂಡಿ ತಿಳಿಸಿದೆ.
ಜನರ ಸುರಕ್ಷತೆಯನ್ನು ಪರಿಗಣಿಸಿ ತಮಿಳುನಾಡು ಮುಖ್ಯಮಂತ್ರಿ ಕೆ.ಪಳನಿಸ್ವಾಮಿ ಅವರು ಚೆನ್ನೈ, ವೆಲ್ಲೂರು, ಕಡಲೂರು, ವಿಲ್ಲುಪುರಂ, ನಾಗಪಟ್ಟಣಂ, ತಿರುವರೂರು, ಚೆಂಗಲ್‌ಪೇಟೆ ಮತ್ತು ಕಾಂಚೀಪುರಂ ಸೇರಿದಂತೆ ೧೩ ಜಿಲ್ಲೆಗಳಿಗೆ ಗುರುವಾರ ಸಾರ್ವಜನಿಕ ರಜಾದಿನವನ್ನು ಘೋಷಿಸಿದ್ದಾರೆ.
ಬುಧವಾರ ಈಗಾಗಲೇ ರಜಾದಿನವೆಂದು ಘೋಷಿಸಲಾಗಿದೆ.
ಪುದುಚೇರಿಯಿಂದ ೧೯೦ ಕಿ.ಮೀ ದೂರದಲ್ಲಿರುವ ಚಂಡಮಾರುತವು ೧೨೦-೧೩೦ ಕಿಮೀ ಗಾಳಿಯ ವೇಗವನ್ನು ೧೪೫ ಕಿಮೀಗೆ ಏರಿಸಿಕೊಂಡು ವಾಯುವ್ಯ ದಿಕ್ಕಿ ಕರಾವಳಿಯತ್ತ ಚಲಿಸುತ್ತಿದೆ ಎಂದು ಐಎಂಡಿ ತನ್ನ ಇತ್ತೀಚಿನ ಹವಾಮಾನ ಬುಲೆಟಿನ್‌ನಲ್ಲಿ ತಿಳಿಸಿದೆ.
ದಕ್ಷಿಣ ಕರಾವಳಿ ಆಂಧ್ರಪ್ರದೇಶದಲ್ಲಿ ಕೂಡಾ ಹೆಚ್ಚಿನ ಸ್ಥಳಗಳಲ್ಲಿ ಮಳೆಯಾಗುವ ಸಾಧ್ಯತೆಯಿದೆ.
ಕರಾವಳಿ ಜಿಲ್ಲೆಗಳಲ್ಲಿ ವಾಸಿಸುವ ಜನರು ತಮ್ಮ ಮನೆಗಳಿಂದ ಹೊರಹೋಗದಂತೆ ತಮಿಳುನಾಡು ಸರ್ಕಾರ ಮನವಿ ಮಾಡಿದೆ. ಮತ್ತು ತಗ್ಗು ಪ್ರದೇಶಗಳಲ್ಲಿ ವಾಸಿಸುವವರು ಆಯಾ ಪ್ರದೇಶಗಳಲ್ಲಿ ಚಂಡಮಾರುತ ಹಿನ್ನೆಲೆಯಲ್ಲಿ ರಚಿಸಲಾಗಿರುವ ಆಶ್ರಯ ಸ್ಥಳಗಳನ್ನು ಸೇರಿಕೊಳ್ಳುವಂತೆ ಕೋರಿದೆ.
ತೀವ್ರವಾಗಿ ಪರಿವರ್ತನೆಗೊಳ್ಳುವುದೆಂದು ನಿರೀಕ್ಷಿಸಲಾಗಿರುವ ಚಂಡಮಾರುತವು ನವೆಂಬರ್ ೨೫ ರ ಸಂಜೆ ತಡರಾತ್ರಿ ಕಾರೈಕಲ್ ಮತ್ತು ಮಾಮಲ್ಲಾಪುರಂ ನಡುವಿನ ತಮಿಳುನಾಡು ಮತ್ತು ಪುದುಚೇರಿ ತೀರಗಳನ್ನು ದಾಟಲಿದೆ ಎಂದು ಭಾರತ ಹವಾಮಾನ ಇಲಾಖೆ (ಐಎಂಡಿ) ) ಮಹಾನಿರ್ದೇಶಕ ಮೃತುಂಜಯ್ ಮಹಾಪಾತ್ರ ಹೇಳಿದರು.
ತಮಿಳುನಾಡು ಬುಧವಾರ ಸಾರ್ವಜನಿಕ ರಜಾದಿನವನ್ನು ಘೋಷಿಸಿದರೆ, ಪುದುಚೇರಿ ಸೆಕ್ಷನ್ ೧೪೪ ಅನ್ನು ಮೂರು ದಿನಗಳವರೆಗೆ ವಿಧಿಸಿದೆ. ತಮಿಳುನಾಡು, ಆಂಧ್ರಪ್ರದೇಶ ಮತ್ತು ಪುದುಚೇರಿಯಲ್ಲಿ ಸುಮಾರು ೧,೨೦೦ ರಾಷ್ಟ್ರೀಯ ವಿಪತ್ತು ಪ್ರತಿಕ್ರಿಯೆ ಪಡೆ (ಎನ್‌ಡಿಆರ್‌ಎಫ್) ರಕ್ಷಣಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿದ್ದು, ಇನ್ನೂ ೮೦೦ ಮಂದಿ ಸನ್ನದ್ಧತೆಯಲ್ಲಿ ಇದ್ದಾರೆ.
ಮುಖ್ಯಾಂಶಗಳು:
* ೧ ಲಕ್ಷಕ್ಕೂ ಹೆಚ್ಚು ಜನರ ಸ್ಥಳಾಂತರ: ಎನ್‌ಡಿಆರ್‌ಎಫ್
* ನಿವಾರ್ ಚಂಡಮಾರುತವು ಮುಂಜಾನೆ ೨ ಗಂಟೆಗೆ ಅಪ್ಪಳಿಸುವ ಸಾಧ್ಯತೆ
* ಪುದುಚೆರಿ ಟುಮಾರೊದಲ್ಲಿ ಸಾರ್ವಜನಿಕ ರಜಾದಿನ
* ಪುದುಚೆರಿ ಮುಖ್ಯಮಂತ್ರಿಯಿಂದ ಕರಾವಳಿ ಪ್ರದೇಶಗಳಿಗೆ ಭೇಟಿ
