ಗ್ರಾಹಕರ ಸುಖ-ದುಃಖ

My Blog List

Friday, December 4, 2020

ಲಸಿಕೆಗಾಗಿ ಶೈತ್ಯಾಗಾರ: ಲಕ್ಸೆಂಬರ್ಗ್ ಸಂಸ್ಥೆ ಜೊತೆ ಮಾತುಕತೆ

 ಲಸಿಕೆಗಾಗಿ ಶೈತ್ಯಾಗಾರ: ಲಕ್ಸೆಂಬರ್ಗ್ ಸಂಸ್ಥೆ ಜೊತೆ ಮಾತುಕತೆ

ನವದೆಹಲಿ: ಲಕ್ಸೆಂಬರ್ಗ್ನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ಬಿ ಮೆಡಿಕಲ್ ಸಿಸ್ಟಮ್ಸ್ ಇಬ್ಬರು ಉನ್ನತ ಅಧಿಕಾರಿಗಳು ಭಾರತದಲ್ಲಿ ಕೋವಿಡ್ -೧೯ ಲಸಿಕೆಗಳಿಗಾಗಿ ಶೈತ್ಯಾಗಾರ ಸರಪಳಿ (ಕೋಲ್ಡ್ ಚೈನ್) ಸ್ಥಾಪಿಸುವ ಬಗ್ಗೆ ಹಿರಿಯ ಸರ್ಕಾರಿ ಅಧಿಕಾರಿಗಳು, ವಿಜ್ಞಾನಿಗಳು ಮತ್ತು ರಾಜತಾಂತ್ರಿಕರೊಂದಿಗೆ ಮಾತುಕತೆ ಆರಂಭಿಸುವ ಸಲುವಾಗಿ ವಾರಾಂತ್ಯದಲ್ಲಿ ನವದೆಹಲಿಗೆ ಆಗಮಿಸಲಿದ್ದಾರೆ.

ವಿಶೇಷ ಶೈತ್ಯೀಕರಿಸಿದ ಲಸಿಕೆ ಸಾರಿಗೆ ಪೆಟ್ಟಿಗೆಗಳು ಮತ್ತು ಫ್ರೀಜರ್ಗಳನ್ನು ಪೂರೈಸಲು ಸಂಸ್ಥೆಯು ತನ್ನ ಭಾರತೀಯ ಪಾಲುದಾರರೊಂದಿಗೆ ದೇಶದಲ್ಲಿ ಸ್ಥಾವರವನ್ನು ಸ್ಥಾಪಿಸಲು ಮುಂದಡಿ ಇಟ್ಟಿದೆ.

ದೇಶಾದ್ಯಂತದ ಜನರಿಗೆ ಕೊರೋನವೈರಸ್ ಲಸಿಕೆಯನ್ನು ತಲುಪುವ ಸಾಗಣೆ ವ್ಯವಸ್ಥೆಯಲ್ಲಿ ಲಸಿಕೆಯನ್ನು ಸಂರಕ್ಷಿಸಿ ಇಡುವ ಕೋಲ್ಡ್ ಚೈನ್ನ್ನು ದೊಡ್ಡ ಸವಾಲಾಗಿ ಪರಿಗಣಿಸಲಾಗಿದೆ.

ಯಾವುದೇ ಸರ್ಕಾರವು ಬಳಸಲು ಮುಕ್ತಗೊಳಿಸಿದ ಮೊದಲ ಕೊರೋನಾವೈರಸ್ ವಿರೋಧೀ ಫಿಜರ್-ಬಯೋಎನ್ಟೆಕ್ ಲಸಿಕೆಯನ್ನು ಮೈನಸ್ ೭೦ ಡಿಗ್ರಿ ಸೆಲ್ಸಿಯಸ್ (-೯೪ ಎಫ್) ಅಥವಾ ಅದಕ್ಕಿಂತ ಕಡಿಮೆ ತಾಪಮಾನದಲ್ಲಿ ಸಂಗ್ರಹಿಸಬೇಕಾಗುತ್ತದೆ. ಮಾಡರ್ನಾದ ಲಸಿಕೆಯನ್ನು ಸಾಗಣೆ ಮತ್ತು ಆರು ತಿಂಗಳವರೆಗೆ ದೀರ್ಘಾವಧಿಯ ಶೇಖರಣೆಗಾಗಿ ಮೈನಸ್ ೨೦ ಡಿಗ್ರಿ ಸೆಲ್ಸಿಯಸ್ನಲ್ಲಿ ಇಡಬೇಕಾಗಿದೆ, ಆದರೆ ಇದನ್ನು ೧೦ ದಿನಗಳವರೆಗೆ ನಿಯಮಿತ ಶೈತ್ಯೀಕರಣದ ತಾಪಮಾನದಲ್ಲಿ ಇಡಬಹುದು ಎಂದು ಸುದ್ದಿ ಸಂಸ್ಥೆ ವರದಿಯೊಂದು ತಿಳಿಸಿದೆ.

ಭಾರತವು ಫಿಜರ್ ಲಸಿಕೆಗಾಗಿ ಹೋಗದಿರಬಹುದು, ಬದಲಿಗೆ ದೇಶದಲ್ಲಿ ತಯಾರಿಸಿದ ಯಾವುದಾದರೂ ಲಸಿಕೆ ಒಂದಕ್ಕಾಗಿ ಕೆಲವು ವಾರಗಳವರೆಗೆ ಕಾಯಲಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಸೂಚಿಸಿದ್ದಾರೆ. "ಕೋವಿಡ್ -೧೯ ವಿರುದ್ಧ ಅಗ್ಗದ ಆದರೆ ಪರಿಣಾಮಕಾರಿ ಲಸಿಕೆಯನ್ನು ಜಗತ್ತು ಎದುರು ನೋಡುತ್ತಿದೆ. ಅಂತಹ ಲಸಿಕೆಗಾಗಿ ಜಗತ್ತು ಭಾರತವನ್ನು ನೋಡುತ್ತಿದೆ ಎಂದು ಪ್ರಧಾನಿ ಶುಕ್ರವಾರ ಸರ್ವಪಕ್ಷ ಸಭೆಯಲ್ಲಿ ಹೇಳಿದರು.

ಬೆಲೆ ಒಂದು ಅಂಶ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇನ್ನೊಂದು ವಿತರಣೆಯ ಸಾಗಣೆ ವ್ಯವಸ್ಥೆ. ಲಸಿಕೆ ಸಂಗ್ರಹಣೆ ಮತ್ತು ಸಾರಿಗೆ ವ್ಯವಸ್ಥೆಗಳನ್ನು ಸರ್ಕಾರ ಪರಿಶೀಲಿಸುತ್ತಿದೆ ಎಂದು ಪ್ರಧಾನಿ ತಿಳಿಸಿದರು.

ಕಳೆದ ತಿಂಗಳು ಲಕ್ಸೆಂಬರ್ಗ್ ಪ್ರಧಾನ ಮಂತ್ರಿ ಕ್ಸೇವಿಯರ್ ಬೆಟೆಲ್ರೊಂದಿಗಿನ ಪ್ರಧಾನಿ ಮೋದಿಯವರ ಸಂಭಾಷಣೆಯಲ್ಲಿ ಲಸಿಕೆಯ ಸಾಗಣೆ ಸವಾಲು ಕಂಡುಬಂದಿದೆ ಎಂದು ಪ್ರಧಾನಿ ಹೇಳಿದ್ದರು. ಅವರು ಬಿ ಮೆಡಿಕಲ್ ಸಿಸ್ಟಮ್ಸ್ ಮೂಲಕ ಲಸಿಕೆ ಕೋಲ್ಡ್ ಚೈನ್ ಸ್ಥಾಪಿಸಲು ಸಹಾಯ ಕೋರಿದ್ದರು.

ಬಿ ಮೆಡಿಕಲ್ ಸಿಸ್ಟಮ್ಸ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಲುಕ್ ಪ್ರೊವೊಸ್ಟ್ ಮತ್ತು ಉಪ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಜೆಸಾಲ್ ದೋಶಿ ಅವರು ಶನಿವಾರ ದೇಶಕ್ಕೆ ಆಗಮಿಸುತ್ತಿದ್ದು, ಭಾನುವಾರದಿಂದ ಆರಂಭಗೊಂಡು ಮುಂದಿನ ಎರಡು ದಿನಗಳಲ್ಲಿ ಎನ್ಐಟಿಐ ಆಯೋಗ ಮತ್ತು ಆರೋಗ್ಯ ಮತ್ತು ವಿದೇಶಾಂಗ ವ್ಯವಹಾರಗಳ ಸಚಿವಾಲಯಗಳ ಉನ್ನತ ಅಧಿಕಾರಿಗಳೊಂದಿಗೆ ಸಭೆ ನಡೆಸಲಿದ್ದಾರೆ.

ಬಳಿಕ ಅವರು ಕೋವಿಡ್ ಲಸಿಕೆಗಾಗಿ ಕೆಲಸ ಮಾಡುತ್ತಿರುವ ಭಾರತದ ಮೂರು ಉನ್ನತ ಕಂಪೆನಿಗಳ Pಜೊತೆ ಸಭೆಗಳಿಗಾಗಿ ಅವರು ಹೈದರಾಬಾದ್, ಪುಣೆ ಮತ್ತು ಅಹಮದಾಬಾದಿಗೆ ಪ್ರಯಾಣಿಸುತ್ತಾರೆ; ಹೈದರಾಬಾದಿನ  ಭಾರತ್ ಬಯೋಟೆಕ್ ಮತ್ತು ಪುಣೆಯ ಸೀರಮ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾ ಮತ್ತು ಅಹಮದಾಬಾದಿನ ಝೈಡಸ್ ಬಯೋಟೆಕ್ ಪಾರ್ಕ್ ಮೂರು ಕಂಪೆನಿಗಳು ಕೊರೋನಾ ನಿರೋಧಿ ಲಸಿಕೆ ಅಭಿವೃದ್ಧಿಯಲ್ಲಿ ಮಗ್ನವಾಗಿವೆ.

ಲಸಿಕೆಗಳನ್ನು ಮೈನಸ್ ೮೦ ಡಿಗ್ರಿ ಸೆಲ್ಸಿಯಸ್ನಲ್ಲಿ ಸಂಗ್ರಹಿಸುವ ತಂತ್ರಜ್ಞಾನ ಹೊಂದಿರುವ ಬಿ ಮೆಡಿಕಲ್ ಸಿಸ್ಟಮ್ಸ್ ಅಂತಿಮವಾಗಿ ಗುಜರಾತಿನಲ್ಲಿ ಸ್ಥಾವರವನ್ನು ನಿರ್ಮಿಸಲು ಉದ್ದೇಶಿಸಿದೆ. ಆದರೆ ಇದು ಸಮಯ ತೆಗೆದುಕೊಳ್ಳುತ್ತದೆ ಮತ್ತು ಮಧ್ಯಂತರದಲ್ಲಿ, ಉತ್ಪಾದನೆ ಪ್ರಾರಂಭವಾದ ತಕ್ಷಣ ಲಸಿಕೆಗಳನ್ನು ಸಾಗಿಸಲು ಬಳಸಬಹುದಾದ ಪೆಟ್ಟಿಗೆಗಳನ್ನು ಕಂಪೆನಿಯು ಆಮದು ಮಾಡಿಕೊಳ್ಳುವ ನಿರೀಕ್ಷೆಯಿದೆ.

ಕ್ಲಿನಿಕಲ್ ಪ್ರಯೋಗಗಳನ್ನು ನಡೆಸುತ್ತಿರುವ ಮುಂಬೈ ಆಸ್ಪತ್ರೆಗೆ ನಿರ್ಣಾಯಕ ಕೋವಿಡ್ -೧೯ ಲಸಿಕೆಗಳನ್ನು ಸಂಗ್ರಹಿಸಲು ಉಪಕರಣಗಳನ್ನು ದಾನ ಮಾಡುವ ನಿಟ್ಟಿನಲ್ಲಿ ಬೃಹನ್ಮುಂಬಯಿ ಮುನಿಸಿಪಲ್ ಕಾರ್ಪೊರೇಶನ್ ಜೊತೆ ಸಹಭಾಗಿತ್ವ ಮಾಡಿಕೊಳ್ಳಲಾಗಿದೆ ಎಂದು ಕಂಪೆನಿಯ ವೆಬ್ ಸೈಟ್ ಸೆಪ್ಟೆಂಬರಿನಲ್ಲಿ ಹೇಳಿತ್ತು.

No comments:

Advertisement