ದೆಹಲಿಗೆ ಹೊರಟ ರೈತರಿಗೆ ಜಲ ಫಿರಂಗಿ, ಅಶ್ರುವಾಯು, ಬ್ಯಾರಿಕೇಡ್ ತಡೆ

 ದೆಹಲಿಗೆ ಹೊರಟ ರೈತರಿಗೆ ಜಲ ಫಿರಂಗಿ, ಅಶ್ರುವಾಯು, ಬ್ಯಾರಿಕೇಡ್ ತಡೆ

ನವದೆಹಲಿ:  ಕೇಂದ್ರ ಸರ್ಕಾರ ಕೃಷಿ ಕಾಯ್ದೆಯನ್ನು ಪ್ರತಿಭಟಿಸಲು 2020 ನವೆಂಬರ 26ರ ಗುರುವಾರ ಭಾರೀ ಸಂಖ್ಯೆಯಲ್ಲಿ ’ದೆಹಲಿ ಚಲೋ’ ಮೆರವಣಿಗೆ ಹೊರಟ ರೈತರು ಹರಿಯಾಣದಲ್ಲಿ ಪೊಲೀಸರ ಬ್ಯಾರಿಕೇಡ್, ಜಲ ಫಿರಂಗಿ ಮತ್ತು ಅಶ್ರುವಾಯುವನ್ನು ಎದುರಿಸಬೇಕಾಯಿತು.

ಹರಿಯಾಣ ರೈತರು ಬ್ಯಾರಿಕೇಡ್‌ಗಳನ್ನು ಕಿತ್ತುಹಾಕಿ ಕರ್ನಾಲ್ ಪಟ್ಟಣದಿಂದ ೫ ಕಿ.ಮೀ ದೂರದಲ್ಲಿರುವ ಕರ್ಣ ಸರೋವರದ ಬಳಿ ಸೇತುವೆಯ ಮೇಲೆ ನಿಲ್ಲಿಸಿದ್ದ ಲಾರಿಗಳ ಮೂಲಕ ತಮ್ಮ ದೆಹಲಿ ಚಲೋ ಮೆರವಣಿಗೆಯನ್ನು ಪುನರಾರಂಭಿಸಲು ಹೊರಟಾಗ ಪೊಲೀಸರು ಅಶ್ರುವಾಯು ಮತ್ತು ನೀರಿನ ಫಿರಂಗಿಗಳನ್ನು ಬಳಸಿದರು. ಆದರೆ ರೈತರು ಇವೆಲ್ಲ ಅಡೆ ತಡೆ ಎದುರಿಸುತ್ತಲೇ ’ದೆಹಲಿ ಚಲೋ’ ಮುಂದುವರಿಸಿದರು ಎಂದು ಸುದ್ದಿ ಮೂಲಗಳು ತಿಳಿಸಿವೆ.

ಘರೌಂಡಾದಲ್ಲಿ ರೈತರನ್ನು ತಡೆಯುವ ಮತ್ತೊಂದು ಪ್ರಯತ್ನ ಮಾಡಲಾಗುವುದು ಎಂದು ಕರ್ನಾಲ್ ಪೊಲೀಸ್ ವರಿಷ್ಠಾಧಿಕಾರಿ ಗಂಗಾ ರಾಮ್ ಪುನಿಯಾ ಬಳಿಕ ತಿಳಿಸಿದ್ದಾರೆ.

ಅಂಬಾಲಾದ ಸದೋಪುರ ಗಡಿಯಲ್ಲಿ ಬ್ಯಾರಿಕೇಡ್‌ಗಳನ್ನು ಭೇದಿಸಲು ಯತ್ನಿಸುತ್ತಿದ್ದ ದೆಹಲಿಗೆ ಹೊರಟಿದ್ದ ಪ್ರತಿಭಟನಾಕಾರ ರೈತರನ್ನು ಚದುರಿಸಲು ಪೊಲೀಸರು ಜಲ ಫಿರಂಗಿಗಳನ್ನು ಮತ್ತು ಅಶ್ರುವಾಯು ಶೆಲ್‌ಗಳನ್ನು ಬಳಸಿದರು. ರೈತರು ಪೊಲೀಸರನ್ನು ವಿರೋಧಿಸುತ್ತಿದ್ದ ದೃಶ್ಯಗಳು ಕಂಡು ಬಂದವು.

ಪ್ರದರ್ಶನಕಾರರು ಸದೋಪುರದ ಬ್ಯಾರಿಕೇಡ್‌ಗಳನ್ನು ಮುರಿದು ಎಳೆಯಲು ಪ್ರಯತ್ನಿಸಿದ್ದು, ಪರಿಸ್ಥಿತಿಯನ್ನು ನಿಯಂತ್ರಿಸಲು ಪೊಲೀಸರು ಪ್ರದರ್ಶನಕಾರರನ್ನು ಅಡ್ಡಗಟ್ಟುವ ಕ್ರಮ ಕೈಗೊಳ್ಳಬೇಕಾಯಿತು ಎಂದು ವರದಿಗಳು ಹೇಳಿವೆ.

ಮೆರವಣಿಗೆ ತಡೆ ಒಡ್ಡಿದ್ದರಿಂದ ಕೋಪಗೊಂಡ ರೈತರು ಶಂಭು ಗಡಿಯಲ್ಲಿ ಭದ್ರತಾ ಪಡೆಗಳ ಮೇಲೆ ಕಲ್ಲು ಎಸೆದರು.

ಟ್ರಾಫಿಕ್ ಜಾಮ್:

ಕರ್ನಾಲ್ ಬಳಿ ಹರಿಯಾಣ, ಪಂಜಾಬ್, ಹಿಮಾಚಲ ಪ್ರದೇಶ ಮತ್ತು ಜಮ್ಮು ಮತ್ತು ಕಾಶ್ಮೀರವನ್ನು ರಾಷ್ಟ್ರ ರಾಜಧಾನಿಯೊಂದಿಗೆ ಸಂಪರ್ಕಿಸುವ ಹೆದ್ದಾರಿಯನ್ನು ೧೫ ಕಿ.ಮೀ ಉದ್ದಕ್ಕೆ ತಡೆದ ಪೊಲೀಸರು ಸಂಚಾರವನ್ನು ಬೇರೆಡೆಗೆ ತಿರುಗಿಸಿದ್ದರಿಂದ ಸಾವಿರಾರು ವಾಹನಗಳು, ವಿಶೇಷವಾಗಿ ಟ್ರಕ್ಕುಗಳು ಮತ್ತು ಬಸ್ಸುಗಳು ರಾಷ್ಟ್ರೀಯ ಹೆದ್ದಾರಿ -೪೪ ರಲ್ಲಿ ಸಿಕ್ಕಿಹಾಕಿಕೊಂಡವು.

ರಂಬಾ-ಇಂದ್ರಿ-ಕರ್ನಾಲ್ ಲಿಂಕ್ ರಸ್ತೆಯಲ್ಲಿ ಸಂಚಾರವನ್ನು ತಿರುಗಿಸಲಾಯಿತು. "ನಾವು ಕಳೆದ ೧೫ ಗಂಟೆಗಳಿಂದ ಸಿಲುಕಿಕೊಂಡಿದ್ದೇವೆ ಮತ್ತು  ಇಲ್ಲಿಂದ ಹೊರಡಲು ಎಷ್ಟು ಸಮಯ ತೆಗೆದುಕೊಳ್ಳುತ್ತದೆ ಎಂಬುದು ನಮಗೆ ತಿಳಿದಿಲ್ಲ" ಎಂದು ಲೂಧಿಯಾನಕ್ಕೆ ತೆರಳುವ ಟ್ರಕ್ ಚಾಲಕ ಸತ್ಪಾಲ್ ಸಿಂಗ್ ಹೇಳಿದರು.

ಅಂಬಾಲಾ ಕಂಟೋನ್ಮೆಂಟ್ ಬಳಿ ಹೆದ್ದಾರಿಯಲ್ಲಿ ಸೇನಾ ಬೆಂಗಾವಲುಗಳು ಸೇರಿದಂತೆ ಭಾರಿ ವಾಹನಗಳು ಸಿಕ್ಕಿಹಾಕಿಕೊಂಡಿವೆ. ವಾಹನಗಳು ಹಲವಾರು ಕಿಲೋಮೀಟರ್‌ಗಳಷ್ಟು ದೂರ ಸಾಲಾಗಿ ನಿಂತಿವೆ ಎಂದು ವರದಿಗಳು ಹೇಳಿವೆ.

ಭಾರಿ ವಾಹನಗಳನ್ನು ತಿರುಗಿಸುವುದರಿಂದ ಪಟ್ಟಣಗಳಲ್ಲಿ ಸಂಚಾರ ದಟ್ಟಣೆ ಉಂಟಾಗಬಹುದು, ಆದ್ದರಿಂದ ಅವುಗಳನ್ನು ಹೆದ್ದಾರಿಯಲ್ಲಿ ಸಾಲಾಗಿ ನಿಲ್ಲಿಸಲಾಗಿದೆ ಎಂದು ಅಂಬಾಲಾ ಪೊಲೀಸ್ ವರಿಷ್ಠಾಧಿಕಾರಿ ರಾಜೇಶ್ ಕಾಲಿಯಾ ಹೇಳಿದರ.

ಕೇಂದ್ರದ ಹೊಸ ಕೃಷಿ ಕಾನೂನುಗಳನ್ನು ಪ್ರತಿಭಟಿಸಲು ಸಂವಿಧಾನ ದಿನಾಚರಣೆಯಂತೇ ರೈತರು ದೆಹಲಿ ಚಲೋ ಕರೆ ನೀಡಿದ್ದಾರೆ.

ಕೇಂದ್ರವು ಜಾರಿಗೊಳಿಸಿರುವ ಮೂರು ಕಾನೂನುಗಳು ಮಧ್ಯವರ್ತಿಗಳನ್ನು ದೂರವಿಡುತ್ತವೆ ಎಂದು ಸರ್ಕಾರವು ಹೇಳುತ್ತಿದ್ದರೆ, ರೈತರು ತಮ್ಮ ಉತ್ಪನ್ನಗಳನ್ನು ವಾಣಿಜ್ಯ ಮಾರುಕಟ್ಟೆಗಳಲ್ಲಿ ಮಾರಾಟ ಮಾಡಲು ಅನುವು ಮಾಡಿಕೊಡುತ್ತದೆ, ಇದು ಸರ್ಕಾರವು ಖಾತರಿಪಡಿಸಿದ ಬೆಲೆಯಲ್ಲಿ ಉತ್ಪನ್ನಗಳನ್ನು ಖರೀದಿಸದಿರಲು ಕಾರಣವಾಗಬಹುದು ಮತ್ತು ಇದರಿಂದಾಗಿ ಸಮಯೋಚಿತ ಪಾವತಿಗಳಿಗೆ ಅಡ್ಡಿಯಾಗುತ್ತದೆ ಎಂದು  ಪ್ರತಿಭಟನಾಕಾರರು ಆತಂಕ ವ್ಯಕ್ತಪಡಿಸಿದ್ದಾರೆ.

ಅಮರೀಂದರ್, ಸುಖಬೀರ್ ಸಿಂಗ್ ಖಂಡನೆ

sದೆಹಲಿಗೆ ಹೊರತ ರೈತ ಪ್ರತಿಭಟನಕಾರರನ್ನು ಸಂವಿಧಾನ ದಿನದಂದೇ ಬ್ಯಾರಿಕೇಡ್, ಜಲಫಿರಂಗಿ ಮತ್ತು ಅಶ್ರುವಾಯು ಶೆಲ್ ಬಳಸಿ ತಡೆದುದಕ್ಕಾಗಿ ಹರಿಯಾಣದ ಮುಖ್ಯಮಂತ್ರಿ ಮನೋಹರಲಾಲ್ ಖಟ್ಟರ್ ಅವರನ್ನು ಪಂಜಾಬ್ ಮುಖ್ಯಮಂತ್ರಿ ಕ್ಯಾಪ್ಟನ್ ಅಮರೀಂದರ್ ಸಿಂಗ್ ಖಂಡಿಸಿದ್ದಾರೆ.

ಇದೇ ವೇಳೆಗೆ ಹೇಳಿಕೆ ನೀಡಿದ ಶಿರೋಮಣಿ ಅಕಾಲಿ ದಳದ (ಎಸ್‌ಯುಡಿ) ಮುಖ್ಯಸ್ಥ ಸುಖಬೀರ್ ಸಿಂಗ್ ಬಾದಲ್ ಅವರೂ ಖಟ್ಟರ್ ಅವರನ್ನು ಟೀಕಿಸಿದರು.