ರಾಷ್ಟ್ರಪತಿ ಕೋವಿಂದ್, ಪ್ರಧಾನಿ ಮೋದಿ ಹಾರಾಟಕ್ಕೆ ಹೊಸ ವಿಮಾನ
ವಿವಿಐಪಿ ಪ್ರಯಾಣಕ್ಕಷ್ಟೇ ಸೀಮಿತವಾದ ಈ ಎರಡು ವಿಮಾನಗಳನ್ನು ಜುಲೈ ವೇಳೆಗೆ ಒದಗಿಸಲಾಗುವುದು ಎಂದು ಸರ್ಕಾರಿ ಅಧಿಕಾರಿಗಳು ಕಳೆದ ವರ್ಷ ಅಕ್ಟೋಬರಿನಲ್ಲಿ ತಿಳಿಸಿದ್ದರು.
‘ಮೂಲತಃ ಕೋವಿಡ್-೧೯ ಕಾರಣದಿಂದ ಸ್ವಲ್ಪ ವಿಳಂಬವಾಗಿದೆ, ಎರಡೂ ವಿಮಾನಗಳು ಸೆಪ್ಟೆಂಬರ್ ವೇಳೆಗೆ ತಲುಪಲಿವೆ’ ಎಂದು ಅಧಿಕಾರಿಗಳು ಸೋಮವಾರ ನುಡಿದರು.
ಬೋಯಿಂಗ್ ಬಿ೭೭೭ ವಿಮಾನಗಳೆರಡನ್ನೂ ಭಾರತೀಯ ವಾಯುಪಡೆ ಪೈಲಟ್‌ಗಳು ಚಲಾಯಿಸುತ್ತರೆ, ಏರ್ ಇಂಡಿಯಾ ಪೈಲಟ್‌ಗಳು ಅಲ್ಲ. ಆದಾಗ್ಯೂ, ಅಗಲವಾದ ಈ ವಿಮಾನಗಳನ್ನು ಭಾರತೀಯ ರಾಷ್ಟ್ರೀಯ ವಿಮಾನಯಾನ ಸಂಸ್ಥೆಯ ಆಧೀನ ಸಂಸ್ಥೆಯಾಗಿರುವ ಏರ್ ಇಂಡಿಯಾ ಎಂಜಿನಿಯರಿಂಗ್ ಸರ್ವೀಸಸ್ ಲಿಮಿಟೆಡ್ (ಎಐಇಎಸ್ ಎಲ್) ನಿರ್ವಹಿಸುತ್ತದೆ ಎಂದು ಅಧಿಕಾರಿಗಳು ಹೇಳಿದರು.
ಪ್ರಸ್ತುತ, ಪ್ರಧಾನಿ, ರಾಷ್ಟ್ರಪತಿ ಮತ್ತು ಉಪರಾಷ್ಟ್ರಪತಿಯವರು ಏರ್ ಇಂಡಿಯಾದ ಬಿ೭೪೭ ವಿಮಾನಗಳಲ್ಲಿ ಹಾರಾಟ ನಡೆಸುತ್ತಾರೆ. ಈ ವಿಮಾನಗಳು ‘ಏರ್ ಇಂಡಿಯಾ ಒನ್’ ಎಂಬ ಕರೆ ಚಿಹ್ನೆಯನ್ನು ಹೊಂದಿವೆ.
ಏರ್ ಇಂಡಿಯಾ ಪೈಲಟ್‌ಗಳು ಗಣ್ಯರಿಗಾಗಿ ಈ ಬಿ೭೪೭ ವಿಮಾನಗಳನ್ನು ಹಾರಿಸುತ್ತಾರೆ ಮತ್ತು ಎಐಇಎಸ್ ಎಲ್ ಅವುಗಳ ನಿರ್ವಹಣೆ ಮಾಡುತ್ತದೆ.
ಈ ಬಿ೭೪೭ ವಿಮಾನಗಳನ್ನು ಗಣ್ಯರ ಸಲುವಾಗಿ ಹಾರಿಸದೇ ಇದಾಗ, ಅವುಗಳನ್ನು ಭಾರತದ ರಾಷ್ಟ್ರೀಯ ವಿಮಾನಯಾನ ಸಂಸ್ಥೆಯು ವಾಣಿಜ್ಯ ಹಾರಾಟಗಳಿಗಾಗಿ ಬಳಸುತ್ತದೆ. ಆದರೆ, ಹೊಸ ವಿಮಾನಗಳನ್ನು ಕೇವಲ ಗಣ್ಯರ ಪ್ರಯಾಣಕ್ಕಾಗಿ ಬಳಸಲಾಗುತ್ತದೆ. ಈ ಎರಡು ವಿಮಾನಗಳು ವಿವಿಐಪಿ ಪಯಣಕ್ಕಾಗಿ ನಿಯೋಜಿತವಾಗುವ ಮುನ್ನ ೨೦೧೮ರಲ್ಲಿ ಕೆಲವು ತಿಂಗಳ ಕಾಲ ಏರ್ ಇಂಡಿಯಾದ ವಾಣಿಜ್ಯ ವಿಮಾನಗಳ ಜೊತೆಗಿದ್ದವು.
ಬಿ೭೭೭ ವಿಮಾನಗಳು ಲಾರ್ಜ್ ಏರ್ ಕ್ರಾಫ್ಟ್ ಇನ್ ಫ್ರಾರೆಡ್ ಕೌಂಟರ್ ಮೆಷರ್‍ಸ್ (ಎಲ್ ಎಐಆರ್ ಸಿಎಂ) ಹೆಸರಿನ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಗಳನ್ನು ಮತ್ತು ಸ್ವಯಂ ರಕ್ಷಣಾ ಸ್ಯೂಟ್‌ಗಳನ್ನು (ಎಸ್‌ಪಿಎಸ್) ಹೊಂದಿವೆ.
ಫೆಬ್ರುವರಿಯಲ್ಲಿ ಅಮೆರಿಕವು ಭಾರತಕ್ಕೆ ಎರಡು ರಕ್ಷಣಾ ವ್ಯವಸ್ಥೆಗಳನ್ನು ೧೯೦ ಮಿಲಿಯನ್ (೧೯ ಕೋಟಿ) ಅಮೆರಿಕನ್ ಡಾಲರ್ ವೆಚ್ಚದಲ್ಲಿ ಮಾರಾಟ ಮಾಡಲು ಒಪ್ಪಿತ್ತು.
೬೦,೦೦೦ ಕೋಟಿ ರೂ.ಗಳ ಸಾಲ ಹೊಂದಿರುವ ಏರ್ ಇಂಡಿಯಾದಲ್ಲಿನ ತನ್ನ ಪಾಲನ್ನು ಮಾರುವ ಪ್ರಕ್ರಿಯೆಯನ್ನು ಕೇಂದ್ರ ಈಗಾಗಲೇ ಪ್ರಾರಂಭಿಸಿದೆ. ಆದರೆ, ಸಿಒವಿಐಡಿ -೧೯ ಸಾಂಕ್ರಾಮಿಕ ರೋಗದಿಂದಾಗಿ ಈ ಪ್ರಕ್ರಿಯೆಯನ್ನು ಮುಂದೂಡಲಾಗಿದೆ.
"(ವಾಯುಯಾನ) ಸಚಿವಾಲಯ ಮತ್ತು ಭಾರತ ಸರ್ಕಾರಕ್ಕೆ ಸಂಬಂಧಿಸಿದ ಈ ವಿಷಯಗಳ ಬಗ್ಗೆ ನಾವು ಯಾವುದೇ ಪ್ರತಿಕ್ರಿಯೆ ನೀಡಲು ಇಷ್ಟಪಡುವುದಿಲ್ಲ" ಎಂದು ಏರ್ ಇಂಡಿಯಾ ವಕ್ತಾರರು ಸುದ್ದಿ ಸಂಸ್ಥೆಯ ಪ್ರಶ್ನೆಗಳಿಗೆ ಉತ್ತರಿಸುತ್ತಾ ಹೇಳಿದರು.
ಈ ವಿಷಯದ ಪ್ರಶ್ನೆಗಳಿಗೆ ಬೋಯಿಂಗ್ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
No comments:
Post a Comment