ರೈತ, ಕಾರ್ಮಿಕರದಷ್ಟೇ ಅಲ್ಲ, ಇದು ಭಾರತದ ಹೋರಾಟ: ರಾಹುಲ್ ಗಾಂಧಿ

 ರೈತ, ಕಾರ್ಮಿಕರದಷ್ಟೇ ಅಲ್ಲ, ಇದು ಭಾರತದ ಹೋರಾಟ: ರಾಹುಲ್ ಗಾಂಧಿ

ನವದೆಹಲಿ: ’ಈ ಶಾಸನಗಳ ವಿರುದ್ಧದ ಹೋರಾಟವು ರೈತರು ಅಥವಾ ಕಾರ್ಮಿಕರ ಹೋರಾಟ ಮಾತ್ರವಲ್ಲ, ಇದು "ಭಾರತದ ಹೋರಾಟ’ ಎಂಬುದಾಗಿ ಹೇಳುವ ಮೂಲಕ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರು ಮಂಗಳವಾರ 2020 ಅಕ್ಟೋಬರ್ 06ರ ಮಂಗಳವಾರ ಕೇಂದ್ರದ ಹೊಸ ಕೃಷಿ ಕಾನೂನುಗಳ ಮೇಲೆ ದಾಳಿ ನಡೆಸಿದರು.

ಭಾನುವಾರ ಮೊಗಾ ಜಿಲ್ಲೆಯಿಂದ ಪ್ರಾರಂಭವಾದ ಅವರ ’ಖೇತಿ ಬಚಾವೊ ಯಾತ್ರೆ’ಯ ಮುಕ್ತಾಯದ ದಿನವಾದ ಮಂಗಳವಾರ ಹರಿಯಾಣದಲ್ಲಿ ನಡೆದ ಸಭೆಯನ್ನುದ್ದೇಶಿಸಿ ಮಾತನಾಡಿದ ಗಾಂಧಿ, ಈ ಕ್ರಮಗಳನ್ನು ಜಾರಿಗೊಳಿಸಿದರೆ ರೈತರು ಮತ್ತು ಕಾರ್ಮಿಕರು ಕೆಲವು ಕಾರ್ಪೊರೇಟ್‌ಗಳ "ಗುಲಾಮರಾಗುತ್ತಾರೆ’. ಒಂದು ಅಥವಾ ಎರಡು ವರ್ಷಗಳಲ್ಲಿ, ಕಾರ್ಪೊರೇಟ್‌ಗಳು ಅವರ ಭೂಮಿಯನ್ನು ಸ್ವಾಧೀನಪಡಿಸಿಕೊಳ್ಳುತ್ತಾರೆ’ ಎಂದು ಹೇಳಿದರು.

"ನೀವು ಅದನ್ನು ನಂಬಲು ಬಯಸುತ್ತೀರೋ ಇಲ್ಲವೋ, ನಿಮ್ಮ ಭೂಮಿಯನ್ನು ಕಸಿದುಕೊಳ್ಳಲಾಗುವುದು ಎಂದು ರಾಹುಲ್ ಮತ್ತು ಅಮರಿಂದರ್ ಸಿಂಗ್ ಒಮ್ಮೆ ಹೇಳಿದ್ದನ್ನು ನೆನಪಿಡಿ’ ಎಂದು ಅವರು ತಮ್ಮ ಟ್ರಾಕ್ಟರುಗಳ ಜೊತೆಗೆ ಹಾಜರಿದ್ದ ರೈತರ ಸಭೆಗೆ ತಿಳಿಸಿದರು.

"ಇದು ಕ್ರಮ ತೆಗೆದುಕೊಳ್ಳುವ ಸಮಯ. ನೀವು ಆರು ತಿಂಗಳು ಅಥವಾ ಒಂದು ವರ್ಷ ಕಾಯುತ್ತಿದ್ದರೆ,  ಯಾವುದೇ ಪ್ರಯೋಜನವಾಗುವುದಿಲ್ಲ’ ಎಂದು ಗಾಂಧಿ ಹೇಳಿದರು. ನಷ್ಟವು ಕೇವಲ ರೈತರು, ಕೃಷಿ ಕಾರ್ಮಿಕರು ಮತ್ತು ಸಣ್ಣ ವ್ಯಾಪಾರಿಗಳದ್ದು ಮಾತ್ರವಲ್ಲ, ಅದು ಇಡೀ ದೇಶಕ್ಕೆ ಆಗುವ ನಷ್ಟ’ ಎಂದು ರಾಹುಲ್ ನುಡಿದರು.

ಹೊಸ ಕಾನೂನುಗಳ ಅನುಷ್ಠಾನದೊಂದಿಗೆ ರೈತರಿಗೆ ಬೀಳುವ ಪೆಟ್ಟು ನಿಜವಾಗಲಿದೆ. ಆಗ ಭಾರತದ ಆಹಾರ ಭದ್ರತೆ ನಾಶವಾಗಲಿದೆ ಅದು ಸಂಭವಿಸಿದಲ್ಲಿ, ಇಡೀ ದೇಶವು ಮತ್ತೊಮ್ಮೆ ಗುಲಾಮವಾಗಲಿದೆ. ಆದ್ದರಿಂದ ಈ ಹೋರಾಟ ಕೇವಲ ರೈತರು ಮತ್ತು ಕಾರ್ಮಿಕg ಹೋರಾಟವಲ್ಲ, ಇದು ಭಾರತದ ಹೋರಾಟವಾಗಿದೆ ಎಂದು ರಾಹುಲ್ ನುಡಿದರು.

ಕಾರ್ಪೊರೇಟ್ ಸಂಸ್ಥೆಗಳು ನಿಯಮಗಳನ್ನು ನಿರ್ದೇಶಿಸುತ್ತವೆ ಮತ್ತು ಅವರು ನೀಡಲು ಬಯಸುವ ಬೆಲೆಯನ್ನು ರೈತರು ಸ್ವೀಕರಿಸಬೇಕಾಗುತ್ತದೆ ಎಂದು ಅವರು ರೈತರಿಗೆ ತಿಳಿಸಿದರು.

"ನಿಮ್ಮ ಜಮೀನು ಹೋದಾಗ, ಅವರು ಮಾಲ್‌ಗಳು ಮತ್ತು ಫ್ಲ್ಯಾಟ್‌ಗಳನ್ನು ನಿರ್ಮಿಸುತ್ತಾರೆ. ಅಂತಹ ಕೆಲಸ ನಡೆಯುವುದನ್ನು ನಾವು ಬಯಸುವುದಿಲ್ಲ. ಕಾಂಗ್ರೆಸ್ ಇದು ಸಂಭವಿಸಲು ಅನುಮತಿ ನೀಡುವುದಿಲ್ಲ. ನಾವು ಒಂದು ಅಂಗುಲದಷ್ಟೂ ಹಿಂದಕ್ಕೆ ಹೋಗುವುದಿಲ್ಲ ಮತ್ತು ನಾವು ಹೋರಾಟ ಮುಂದುವರೆಸುತ್ತೇವೆ ಎಂದು ನಾನು ಖಾತರಿಪಡಿಸುತ್ತೇನೆ’ ಎಂದು ಅವರು ನುಡಿದರು.

’ನಮ್ಮ ಸರ್ಕಾರ ಯಾವಾಗ ರಚನೆಯಾಗುತ್ತದೋ ಆಗ, ನಾವು ಈ ಕಾನೂನುಗಳನ್ನು ಹಿಂತೆಗೆದುಕೊಳ್ಳುತ್ತೇವೆ’ ಎಂದೂ ರಾಹುಲ್ ಹೇಳಿದರು.

ಕೇಂದ್ರದಲ್ಲಿನ ನರೇಂದ್ರ ಮೋದಿ ಸರ್ಕಾರದ ಮೇಲೆ ದಾಳಿ ಮಾಡಿದ ರಾಹುಲ್ ಆರು ವರ್ಷಗಳಿಂದ ಈ ಆಡಳಿತವು ಬಡ, ದುರ್ಬಲ ವರ್ಗದವರಿಗೆ, ರೈತರಿಗೆ ಮತ್ತು ಸಣ್ಣ ಅಂಗಡಿಯವರಿಗೆ ಏನೂ ಮಾಡಲಿಲ್ಲ ಎಂದು ಹೇಳಿದರು.

"ಆರು ವರ್ಷಗಳಿಂದ ಅವರು ರೈತರಿಗಾಗಿ ಏನೂ ಮಾಡಲಿಲ್ಲ. ಅವರು ಏನೇ ಮಾಡಿದರೂ ಅದು ಶ್ರೀಮಂತ ವರ್ಗಕ್ಕಾಗಿ’ ಎಂದು ರಾಹುಲ್ ಹೇಳಿದರು, ಕೇಂದ್ರವು ಶ್ರೀಮಂತ ಕೈಗಾರಿಕೋದ್ಯಮಿಗಳ ಸಾಲವನ್ನು ೩.೫೦ ಲಕ್ಷ ಕೋಟಿ ರೂ.ಗಳ ಮನ್ನಾ ಮಾಡಿದೆ, ಆದರೆ ರೈತರದಲ್ಲ ಎಂದು ಅವರು ನುಡಿದರು.

ಕೊರೋನವೈರಸ್ ಸಾಂಕ್ರಾಮಿಕದ ಮಧ್ಯದಲ್ಲಿ, ಈ ಸರ್ಕಾರವು ಮೂರು ಕೃಷಿ ಮಸೂದೆಗಳನ್ನು ತಂದಿತು ಎಂದು ಅವರು ಹೇಳಿದರು. "ಏನು ಅವಸರ? ಆರು ತಿಂಗಳು ಅಥವಾ ಒಂದು ವರ್ಷದ ನಂತರ ಅವರನ್ನು ಏಕೆ ತರಬಾರದು?’ ಎಂದು ಅವರು ಕೇಳಿದರು.

’ಏಕೆಂದರೆ ಕೋವಿಡ್ ಸಮಯದಲ್ಲಿ  ಪಂಜಾಬ್, ಹರಿಯಾಣ, ಯುಪಿ, ರಾಜಸ್ಥಾನದ ರೈತರು ಎದ್ದು ನಿಲ್ಲಲು ಸಾಧ್ಯವಿಲ್ಲ ಮತ್ತು ಈ ಕ್ರಮಗಳನ್ನು ತರಲು ಇದು ಸರಿಯಾದ ಸಮಯ ಎಂದು ಬಿಜೆಪಿ ಸರ್ಕಾರ ಭಾವಿಸಿದೆ.

ಆದರೆ ರೈತರು ಬಲಶಾಲಿಗಳು ಮತ್ತು ಈ ಕಾನೂನುಗಳ ವಿರುದ್ಧ ಹೋರಾಡುತ್ತಾರೆ ಎಂದು ಅವರು (ಪ್ರಧಾನಿ) ತಿಳಿದಿಲ್ಲ" ಎಂದು ಕಾಂಗ್ರೆಸ್ ನಾಯಕ ಹೇಳಿದರು.

’ಈ ಕಾನೂನುಗಳು ರೈತರ ಪರವಾಗಿದ್ದರೆ, ಸರ್ಕಾರವು ಅವುಗಳನ್ನು ಸಂಸತ್ತಿನಲ್ಲಿ ಏಕೆ ಚರ್ಚಿಸಲಿಲ್ಲ?’ ಎಂದೂ ರಾಹುಲ್ ಪ್ರಶ್ನಿಸಿದರು.

ಹರಿಯಾಣದ ಪಂಜಾಬ್‌ನ ಗಡಿಯಲ್ಲಿ ಹೈ ಡ್ರಾಮಾ ಬಳಿಕ, ಅಧಿಕಾರಿಗಳು ಕಾಂಗ್ರೆಸ್ ಮಾಜಿ ಮುಖ್ಯಸ್ಥ ರಾಹುಲ್ ಗಾಂಧಿ ಮತ್ತು ಕೆಲವು ಪಕ್ಷದ ಮುಖಂಡರಿಗೆ ಕೃಷಿ ಕಾನೂನುಗಳ ವಿರುದ್ಧದ ರ್‍ಯಾಲಿಯ ಭಾಗವಾಗಿ ಬಿಜೆಪಿ ಆಡಳಿತದ ರಾಜ್ಯಕ್ಕೆ ಪ್ರವೇಶಿಸಲು ಅವಕಾಶ ನೀಡಿದರು.

ಪಟಿಯಾಲಾದ ಸನೌರ್‌ನಲ್ಲಿ ತಮ್ಮ ಕೊನೆಯ ರ್‍ಯಾಲಿಯನ್ನು ಮುಕ್ತಾಯಗೊಳಿಸಿದ ನಂತರ, ಗಾಂಧಿಯವರು ತಮ್ಮ ’ಖೇತಿ ಬಚಾವೊ ಯಾತ್ರ’ದ ಅಂತಿಮ ದಿನ ಹರಿಯಾಣ ಗಡಿಯನ್ನು ತಲುಪಲು ಟ್ರ್ಯಾಕ್ಟರ್ ಓಡಿಸಿದರು, ಅವರೊಂದಿಗೆ ಪಂಜಾಬ್ ಕಾಂಗ್ರೆಸ್ ಅಧ್ಯಕ್ಷ ಸುನಿಲ್ ಜಖರ್ ಮತ್ತು ಪಕ್ಷದ ಹಿರಿಯ ಮುಖಂಡ ಹರೀಶ್ ರಾವತ್ ಇದ್ದರು.

ಪಟಿಯಾಲದಿಂದ ಹಲವಾರು ಕಾಂಗ್ರೆಸ್ ಕಾರ್ಯಕರ್ತರು ಗಾಂಧಿಯೊಂದಿಗೆ ಬಂದರು, ಆದರೆ ಮೆರವಣಿಗೆಯನ್ನು ಪೆಹೋವಾ ಗಡಿಯ ಟಿಯೋಕರ್ ಗ್ರಾಮದ ಬಳಿ ಹೆದ್ದಾರಿಯಲ್ಲಿ ಒಂದು ಗಂಟೆ ನಿಲ್ಲಿಸಲಾಯಿತು.

ಗಾಂಧಿ ಪಂಜಾಬ್-ಹರಿಯಾಣ ಗಡಿಗೆ ಆಗಮಿಸುವ ಮೊದಲು, ಸ್ಥಳದಲ್ಲಿದ್ದ ಹರಿಯಾಣದ ಹಿರಿಯ ಪೊಲೀಸ್ ಅಧಿಕಾರಿಗಳು, ಕೋವಿಡ್ -೧೯ ನಿರ್ಬಂಧದ ಕಾರಣ ಸ್ಥಳದಲ್ಲಿ ಇರುವ ಮಾರ್ಗಸೂಚಿಗಳ ಪ್ರಕಾರ ೧೦೦ ಕ್ಕೂ ಹೆಚ್ಚು ಜನರನ್ನು ಒಂದೇ ಸ್ಥಳದಲ್ಲಿ ಒಟ್ಟುಗೂಡಿಸಲು ಅನುಮತಿ ಇಲ್ಲ ಎಂದು ಹೇಳಿದರು.

ಗಾಂಧಿ ಮತ್ತು ಕೆಲವು ಕಾಂಗ್ರೆಸ್ ಮುಖಂಡರಿಗೆ ನಂತರ ಹರಿಯಾಣಕ್ಕೆ ಪ್ರವೇಶಿಸಲು ಅವಕಾಶ ನೀಡಲಾಯಿತು, ಅಲ್ಲಿ ಮಾಜಿ ಕಾಂಗ್ರೆಸ್ ಮುಖ್ಯಸ್ಥರು ಒಂದೆರಡು ಕಾರ್ಯಕ್ರಮಗಳನ್ನು ನಿಗದಿಪಡಿಸಿದ್ದರು. ಹರಿಯಾಣ ಕಡೆಯ ರಾಜ್ಯ ಕಾಂಗ್ರೆಸ್ ಮುಖ್ಯಸ್ಥ ಕುಮಾರಿ ಸೆಲ್ಜಾ, ಹಿರಿಯ ನಾಯಕರಾದ ಭೂಪಿಂದರ್ ಸಿಂಗ್ ಹೂಡಾ, ರಂದೀಪ್ ಸಿಂಗ್ ಸುರ್ಜೆವಾಲಾ, ಕಿರಣ್ ಚೌಧರಿ, ಅಜಯ್ ಸಿಂಗ್ ಯಾದವ್ ಮತ್ತು ಪಕ್ಷದ ಹರಿಯಾಣ ವ್ಯವಹಾರಗಳ ಉಸ್ತುವಾರಿ ವಿವೇಕ್ ಬನ್ಸಾಲ್ ಉಪಸ್ಥಿತರಿದ್ದರು.