ಭಾರತದಲ್ಲಿ ನಿಯಂತ್ರಣಕ್ಕೆ ಬಂತು ಕೊರೋನಾ, ಶೇ.೬ಕ್ಕೆ ಇಳಿದ ಸೋಂಕು ಪ್ರಸರಣ ಪ್ರಮಾಣ

ಭಾರತದಲ್ಲಿ ನಿಯಂತ್ರಣಕ್ಕೆ ಬಂತು ಕೊರೋನಾ, ಶೇ.೬ಕ್ಕೆ ಇಳಿದ ಸೋಂಕು ಪ್ರಸರಣ ಪ್ರಮಾಣ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಜಾರಿಗೊಳಿಸಿದ ರಾಷ್ಟ್ರವ್ಯಾಪಿ ದಿಗ್ಬಂಧನದ (ಲಾಕ್ ಡೌನ್) ಎರಡನೇ ಅವಧಿ ಸಾಕಷ್ಟು ಪರಿಣಾಮಕಾರಿಯಾಗುವಂತೆ ಕಂಡು ಬಂದಿದ್ದು ದೇಶದಲ್ಲಿ ಕೊರೋನಾವೈರಸ್ ಸೋಂಕಿನ ಪ್ರಸರಣ ಪ್ರಮಾಣ ಶೇಕಡಾ ೬ಕ್ಕೆ ಇಳಿದಿದೆ. ಇದೇ ರೀತಿ ಸೋಂಕಿನ ದುಪ್ಪಟ್ಟು ಪ್ರಮಾಣದ ದಿನಗಳ ಅಂತರವೂ ಹೆಚ್ಚಾಗಿದೆ.

೧೦೦ ಪ್ರಕರಣಗಳನ್ನು ದಾಟಿದಂದಿನಿಂದ ಕಳೆದ ೨೪ ಗಂಟೆಗಳಲ್ಲಿ ಕೋವಿಡ್ -೧೯ ಸೋಂಕು ಪ್ರಸರಣದಲ್ಲಿ ಭಾರತವು ಅತ್ಯಂತ ಕಡಿಮೆ ಬೆಳವಣಿಗೆ ದರವನ್ನು ದಾಖಲಿಸಿದೆ ಎಂದು ಸರ್ಕಾರ ಹೇಳಿತು..

ಸೋಂಕಿನ ಪ್ರಕರಣಗಳ ಸರಾಸರಿ ದುಪ್ಪಟ್ಟು ಪ್ರಮಾಣವು ಇಳಿಕೆಯಾಗಿದ್ದು ೩.೫ ದಿನಗಳಿಗೊಮ್ಮೆ ದುಪ್ಪಟ್ಟಾಗುತ್ತಿದ್ದ ಪ್ರಕರಣಗಳು ಈಗ ೯.೧ ದಿನಗಳಿಗೆ ಒಮ್ಮೆ ದುಪ್ಪಟ್ಟಾಗುತ್ತಿದೆ. ಶುಕ್ರವಾರ ಬೆಳಗ್ಗೆ ೮ ಗಂಟೆಯಿಂದ 2020 ಏಪ್ರಿಲ್ 25ರ ಶನಿವಾರ ಬೆಳಗ್ಗೆ ೮ ಗಂಟೆಯವರೆಗಿನ ಅವಧಿಯಲ್ಲಿ ದಾಖಲಾದ ಹೊಸ ಪ್ರಕರಣಗಳ ಸಂಖ್ಯೆ ಶೇಕಡಾ ೬ಕ್ಕೆ ಕುಸಿದಿದೆ, ಸೋಂಕಿನ ಹೊಸ ಪ್ರಕರಣಗಳ ಸಂಖ್ಯೆ ದೇಶದಲ್ಲಿ ೧೦೦ ದಾಟಿದ ಬಳಿಕ ಇದು ಇತ್ಯಂತ ಕನಿಷ್ಠ ಬೆಳವಣಿಗೆ ಎಂದು ಸರ್ಕಾರ ತಿಳಿಸಿದೆ.

ಕೋವಿಡ್ -೧೯ ಕುರಿತು ಉನ್ನತ ಮಟ್ಟದ ಸಚಿವರ ತಂಡದ ೧೩ ನೇ ಸಭೆ ಕೇಂದ್ರ ಆರೋಗ್ಯ ಸಚಿವ ಹರ್ಷ ವರ್ಧನ್ ಅವರ ಅಧ್ಯಕ್ಷತೆಯಲ್ಲಿ 2020 ಏಪ್ರಿಲ್ 25ರ ಶನಿವಾರ ನಡೆಯಿತು.

ಸಮರ್ಪಿತ ಕೋವಿಡ್-೧೯ ಆಸ್ಪತ್ರೆಗಳು, ಪ್ರತ್ಯೇಕ ಹಾಸಿಗೆಗಳು ಮತ್ತು ವಾರ್ಡುಗಳು, ಪಿಪಿಇ ಕಿಟ್‌ಗಳು, ಎನ್೯೫ ಮುಖಗವಸುಗಳು, ಔಷಧಗಳು, ವೆಂಟಿಲೇಟರುಗಳು ಮತ್ತು ಆಮ್ಲಜನಕದ ಸಿಲಿಂಡರುಗಳು ಮತ್ತಿತರ ವಸ್ತುಗಳ ರಾಜ್ಯವಾರು ವಿವರಗಳನ್ನು ಉನ್ನತ ಸಭೆಗೆ ತಿಳಿಸಲಾಯಿತು ಎಂದು ಆರೋಗ್ಯ ಸಚಿವಾಲಯ ಹೇಳಿತು.

ಮೊದಲೇ ಗುರುತಿಸಲ್ಪಟ್ಟ ದೇಶೀಯ ತಯಾರಕರು ಈಗಾಗಲೇ ಪಿಪಿಇ ಕಿಟ್‌ಗಳು ಮತ್ತು ಮುಖಗವಸುಗಳನ್ನು ತಯಾರಿಸಲು ಪ್ರಾರಂಭಿಸಿದ್ದು ಅವು ಸಾಕಷ್ಟು ಪ್ರಮಾಣದಲ್ಲಿ ಲಭ್ಯವಿವೆ ಎಂದು ಸಚಿವಾಲಯ ತಿಳಿಸಿತು.

"ಈವರೆಗಿನ ಪ್ರಕಾರ, ದೇಶದಲ್ಲಿ ಪ್ರತಿದಿನ ಒಂದು ಲಕ್ಷಕ್ಕೂ ಹೆಚ್ಚು ಪಿಪಿಇ ಕಿಟ್‌ಗಳು ಮತ್ತು ಎನ್ ೯೫ ಮುಖಗವಸುಗಳನ್ನು ತಯಾರಿಸಲಾಗುತ್ತಿದೆ. ಪ್ರಸ್ತುತ, ಪಿಪಿಇಯ ೧೦೪ ದೇಶೀಯ ತಯಾರಕರು ಮತ್ತು ಎನ್ ೯೫ ಮುಖಗವಸುಗಳನ್ನು ತಯಾರಿಸುವ ಮೂವರು ತಯಾರಕರಿದ್ದಾರೆ ಎಂದು ಸಚಿವಾಲಯ ಹೇಳಿತು.

ಇದಲ್ಲದೆ, ವೆಂಟಿಲೇಟರ್ಗಳ ಉತ್ಪಾದನೆಯನ್ನು ಕೂಡಾ ದೇಶೀಯ ತಯಾರಕರು ಪ್ರಾರಂಭಿಸಿದ್ದಾರೆ. ಒಂಬತ್ತು ತಯಾರಕರ ಮೂಲಕ ೫೯,೦೦೦ ಕ್ಕೂ ಹೆಚ್ಚು ಘಟಕಗಳಿಗೆ ವೆಂಟಿಲೇಟರ್ ತಯಾರಿಗೆ ಆದೇಶಗಳನ್ನು ನೀಡಲಾಗಿದೆ ಎಂದು ಅದು ಹೇಳಿತು.

"ಈಗಿನಂತೆ, ಸಾವಿನ ಪ್ರಮಾಣವು ಶೇಕಡಾ ೩.೧ ರಷ್ಟಿದ್ದರೆ, ಚೇತರಿಕೆಯ ಪ್ರಮಾಣವು ಶೇಕಡಾ ೨೦ ಕ್ಕಿಂತ ಹೆಚ್ಚಿದೆ, ಇದು ತುಲನಾತ್ಮಕವಾಗಿ ಹೆಚ್ಚಿನ ದೇಶಗಳಿಗಿಂತ ಉತ್ತಮವಾಗಿದೆ ಮತ್ತು ಇದನ್ನು ಲಾಕ್‌ಡೌನ್, ಕ್ಲಸ್ಟರ್ ನಿರ್ವಹಣೆ ಮತ್ತು ಹತೋಟಿ ತಂತ್ರಗಾರಿಕೆಯ ಧನಾತ್ಮಕ ಪರಿಣಾಮವೆಂದು ಪರಿಗಣಿಸಬಹುದು ಎಂದು ಆರೋಗ್ಯ ಇಲಾಖೆಯು ತಿಳಿಸಿತು.

"ದೇಶzಲ್ಲಿ ಸೋಂಕಿನ ಸರಾಸರಿ ದ್ವಿಗುಣಗೊಳ್ಳುವಿಕೆಯ ಅವಧಿಯು ಈಗಿನಂತೆ ೯.೧ ದಿನಗಳು" ಎಂದು ಸಚಿವಾಲಯ ತಿಳಿಸಿತು. ಈಗಿನಂತೆ, ೫,೦೬೨ ಜನರನ್ನು ಗುಣಪಡಿಸಲಾಗಿದ್ದು ಚೇತರಿಕೆಯ ಪ್ರಮಾಣ ಶೇಕಡಾ ೨೦.೬೬ ರಷ್ಟು  ಎಂದು ಸಚಿವಾಲಯ ಹೇಳಿತು. ಶುಕ್ರವಾರ ಬೆಳಿಗ್ಗೆಯಿಂದ ೧,೪೨೯ ಹೊಸ ಪ್ರಕರಣಗಳು ವರದಿಯಾಗಿದೆ ಎಂದು ಸಚಿವಾಲಯ ತಿಳಿಸಿತು.

ಕೊರೋನಾವೈರಸ್ಸಿಗೆ ಸಾವನ್ನಪ್ಪಿದವರ ಸಂಖ್ಯೆ ೭೭೫ ಕ್ಕೆ ಏರಿದೆ ಮತ್ತು ದೇಶದಲ್ಲಿ ಶನಿವಾರ ಪ್ರಕರಣಗಳ ಸಂಖ್ಯೆ ೨೪,೫೦೬ ಕ್ಕೆ ಏರಿದೆ ಎಂದು ಸಚಿವಾಲಯ ತಿಳಿಸಿತು. ಹಾಟ್‌ಸ್ಪಾಟ್‌ಗಳು ಮತ್ತು ಕ್ಲಸ್ಟರ್ ನಿರ್ವಹಣೆಯ ಕಾರ್ಯತಂತ್ರದ ಜೊತೆಗೆ ದೇಶಾದ್ಯಂತ ಪರೀಕ್ಷಾ ಕಿಟ್‌ಗಳ ಲಭ್ಯತೆ ಮತ್ತು ಪರೀಕ್ಷಾ ಕಾರ್ಯತಂತ್ರವನ್ನು ಸಭೆ  ಪರಿಶೀಲಿಸಿತು.

ಪ್ರಸ್ತುತ ಕೋವಿಡ್-೧೯ ಸೋಂಕನ್ನು  ಪರೀಕ್ಷಿಸುತ್ತಿರುವ ಸಾರ್ವಜನಿಕ ಮತ್ತು ಖಾಸಗಿ ಪ್ರಯೋಗಾಲಯಗಳ ಸಂಖ್ಯೆಯ ಬಗ್ಗೆ ಮತ್ತು ಈ ಪ್ರಯೋಗಾಲಯಗಳ ಜಾಲದ ಮೂಲಕ ಪ್ರತಿದಿನ ನಡೆಸಲಾಗುತ್ತಿರುವ ಪರೀಕ್ಷೆಗಳ ಸಂಖ್ಯೆಯ ಬಗ್ಗೆ ವಿವರಿಸಲಾಯಿತು. ರೋಗದ ಪ್ರತಿಕ್ರಿಯೆ ಮತ್ತು ನಿರ್ವಹಣೆಯೊಂದಿಗೆ ದೇಶದ ಕೋವಿಡ್-೧೯ ಸ್ಥಿತಿಯ ಬಗ್ಗೆ ವಿವರವಾದ ಮಾಹಿತಿಯನ್ನು ಸಚಿವರಿಗೆ ನೀಡಲಾಯಿತು.

ಕೊರೋನವೈರಸ್ ತಡೆಗಟ್ಟುವಿಕೆ, ನಿಯಂತ್ರಣ ಮತ್ತು ನಿರ್ವಹಣೆಗಾಗಿ ಕೇಂದ್ರ ಮತ್ತು ವಿವಿಧ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ತೆಗೆದುಕೊಂಡ ಕ್ರಮಗಳ ಬಗ್ಗೆ ಸಭೆಯು ವಿವರವಾಗಿ ಚರ್ಚಿಸಿತು ಮತ್ತು ಕೋವಿಡ್-೧೯ನ್ನು ಎದುರಿಸಲು ಆಕಸ್ಮಿಕ ಯೋಜನೆಗಳನ್ನು ಅನುಸರಿಸಲು ಮತ್ತು ಮತ್ತಷ್ಟು ಬಲಪಡಿಸಲು ಸೂಚಿಸಲಾಯಿತು ಎಂದು ಸಚಿವಾಲಯ ಹೇಳಿತು.

ಹಲವಾರು ಸಬಲೀಕರಣ ಸಮಿತಿಗಳಿಗೆ ನಿಯೋಜಿಸಲಾದ ವಿವಿಧ ಕಾರ್ಯಗಳ ಬಗ್ಗೆಯೂ ಸಭೆಯು ಚರ್ಚಿಸಿತು. ಸುಮಾರು ೯೨,೦೦೦ ಎನ್‌ಜಿಒಗಳು, ಸ್ವ-ಸಹಾಯ ಗುಂಪುಗಳು (ಸ್ವಸಹಾಯ ಸಂಘಗಳು) ಮತ್ತು ನಾಗರಿಕ ಸಮಾಜ ಸಂಸ್ಥೆಗಳು ದೇಶಾದ್ಯಂತದ ವಲಸೆ ಕಾರ್ಮಿಕರಿಗೆ ಆಹಾರವನ್ನು ಒದಗಿಸುವ ಮೂಲಕ ಕಾರ್ಯನಿರ್ವಹಿಸುತ್ತಿವೆ ಮತ್ತು ಕೊಡುಗೆ ನೀಡುತ್ತಿವೆ ಎಂದು ಸಭೆಗೆ ತಿಳಿಸಲಾಯಿತು.

ಆರೋಗ್ಯ ಕಾರ್ಯಕರ್ತರು, ಎನ್‌ಎಸ್‌ಎಸ್, ಎನ್‌ವೈಕೆ, ಎನ್‌ಸಿಸಿ, ವೈದ್ಯರು ಇತ್ಯಾದಿಗಳ ರಾಷ್ಟ್ರೀಯ ಮಟ್ಟದ ಮಾಹಿತಿಯನ್ನು ಒದಗಿಸಿ, ಎಲ್ಲಾ ರಾಜ್ಯಗಳು, ಜಿಲ್ಲೆಗಳು ಮತ್ತು ಇತರ ಅಧಿಕಾರಿಗಳೊಂದಿಗೆ ಸಂಪನ್ಮೂಲಗಳು ಮತ್ತು ಸ್ವಯಂಸೇವಕರನ್ನು (ಸಿಒವಿಐಡಿ ಯೋಧರು) ಹೆಚ್ಚು ಅಗತ್ಯವಿರುವ ಸ್ಥಳಗಳಿಗೆ ಸಜ್ಜುಗೊಳಿಸುವ ಸಲುವಾಗಿ ಹಂಚಿಕೊಳ್ಳಲಾಗಿದೆ ಎಂದು ಸಭೆಗೆ ತಿಳಿಸಲಾಯಿತು.

ಡ್ಯಾಶ್‌ಬೋರ್ಡ್‌ನಲ್ಲಿ ಪ್ರಸ್ತುತ ೧.೨೪ ಕೋಟಿಗೂ ಹೆಚ್ಚು ಮಾನವ ಸಂಪನ್ಮೂಲಗಳ ದತ್ತಾಂಶವಿದೆ ಮತ್ತು ವಿಶೇಷತೆಯ ಪ್ರಕಾರ ಹೊಸ ಗುಂಪುಗಳು ಮತ್ತು ಉಪ-ಗುಂಪುಗಳನ್ನು ಸೇರಿಸುವುದರೊಂದಿಗೆ ಇದನ್ನು ನಿರಂತರವಾಗಿ ನವೀಕರಿಸಲಾಗುತ್ತಿದೆ ಎಂದು ಸಭೆಗೆ ತಿಳಿಸಲಾಯಿತು. ಡ್ಯಾಶ್‌ಬೋರ್ಡ್‌ನಲ್ಲಿ ಪ್ರತಿ ಗುಂಪಿನಿಂದ ಲಭ್ಯವಿರುವ ಮಾನವ ಸಂಪನ್ಮೂಲಗಳ ಸಂಖ್ಯೆಯ ಬಗ್ಗೆ ರಾಜ್ಯ ಮತ್ತು ಜಿಲ್ಲಾವಾರು ಮಾಹಿತಿಯಿದ್ದು, ಆಯಾ ರಾಜ್ಯ ಮತ್ತು ಜಿಲ್ಲಾ ನೋಡಲ್ ಅಧಿಕಾರಿಗಳ ಸಂಪರ್ಕ ವಿವರಗಳಿವೆ.

"ಈ ಕೋವಿಡ್ ಯೋಧರಿಗೆ ಆರೋಗ್ಯ ಸಚಿವಾಲಯ ಮತ್ತು ಐಗೋಟ್ ತರಬೇತಿ ಪೋರ್ಟಲ್‌ನಂತಹ ಆನ್‌ಲೈನ್ ಪ್ಲಾಟ್‌ಫಾರ್ಮ್‌ಗಳ ಮೂಲಕ ತರಬೇತಿ ನೀಡಲಾಗುತ್ತಿದೆ" ಎಂದು ಹೇಳಿಕೆ ತಿಳಿಸಿತು.

ಸಭೆಯಲ್ಲಿ ನಾಗರಿಕ ವಿಮಾನಯಾನ ಸಚಿವ ರದೀಪ್ ಎಸ್ ಪುರಿ, ವಿದೇಶಾಂಗ ಸಚಿವ ಎಸ್.ಜೈಶಂಕರ್, ಗೃಹ ಖಾತೆ ಸಹಾಯಕ ಸಚಿವ ನಿತ್ಯಾನಂದ ರೈ ಮತ್ತು ಶಿಪ್ಪಿಂಗ್ ಮತ್ತು ರಸಗೊಬ್ಬರ ಸಹಾಯಕ ಸಚಿವ ಮನಸುಖ್ ಮಾಂಡವೀಯ ಮತ್ತಿತರರು ಇದ್ದರು.

ವಿಶ್ವಾದ್ಯಂತ ಕೊರೋನಾವೈರಸ್ ಸೋಂಕಿvರು ೨೮,೬೩,೦೭೪, ಸಾವು ೧,೯೯,೪೮೬

ಚೇತರಿಸಿಕೊಂಡವರು- ೮,೧೬,೦೦೩

ಅಮೆರಿಕ ಸೋಂಕಿತರು ೯,೨೮,೩೭೦, ಸಾವು ೫೨,೩೫೯

ಸ್ಪೇನ್ ಸೋಂಕಿತರು ೨,೨೩,೭೫೯, ಸಾವು ೨೨,೯೦೨

ಇಟಲಿ ಸೋಂಕಿತರು ೧,೯೨,೯೯೪,  ಸಾವು ೨೫,೯೬೯

ಜರ್ಮನಿ ಸೋಂಕಿತರು ೧,೫೫,೪೦೭, ಸಾವು ೫,೮೦೨

ಚೀನಾ ಸೋಂಕಿತರು ೮೨,೮೧೬, ಸಾವು ೪,೬೩೨

ಇಂಗ್ಲೆಂಡ್ ಸೋಂಕಿತರು ೧,೪೮,೩೭೭, ಸಾವು ೨೦,೩೧೯

ಇಂಗ್ಲೆಂಡಿನಲ್ಲಿ ೮೧೩, ಬೆಲ್ಜಿಯಂನಲ್ಲಿ ೨೩೮, ಸ್ಪೇನಿನಲ್ಲಿ ೩೭೮, ಅಮೆರಿಕದಲ್ಲಿ ೧೬೬, ನೆದರ್ ಲ್ಯಾಂಡ್ಸ್‌ನಲ್ಲಿ ೧೨೦, ಮೆಕ್ಸಿಕೋದಲ್ಲಿ ೧೫೨, ಒಟ್ಟಾರೆ ವಿಶ್ವಾದ್ಯಂತ ೨,೩೮೭ ಮಂದಿ ಒಂದೇ ದಿನ ಸಾವನ್ನಪ್ಪಿದ್ದಾರೆ.