೧೮ ಲಕ್ಷ ಉದ್ಯೋಗ: ಬಿಜೆಪಿ ಪ್ರಣಾಳಿಕೆ ಭರವಸೆ
ಬಿಜೆಪಿಯ ಹಿರಿಯ ಮುಖಂಡ ಮತ್ತು ಬಿಹಾರ ಉಪಮುಖ್ಯಮಂತ್ರಿ ಸುಶೀಲ್ ಮೋದಿ ಅವರು ತೇಜಸ್ವಿ ಯಾದವ್ ಅವರು ಚುನಾವಣೆ ನಡೆಯುತ್ತಿರುವ ರಾಜ್ಯದಲ್ಲಿ ೧೦ ಲಕ್ಷ ಸರ್ಕಾರಿ ಉದ್ಯೋಗಗಳನ್ನು ಒದಗಿಸುವ ಭರವಸೆಯನ್ನು ಅಪಹಾಸ್ಯ ಮಾಡಿದ ೨೪ ಗಂಟೆಗಳ ಒಳಗೆ, ಬಿಜೆಪಿ ತನ್ನದೇ ಆದ ಪ್ರಣಾಳಿಕೆಯಲ್ಲಿ ೧೯ ಲಕ್ಷ ಉದ್ಯೋಗಗಳನ್ನು ನೀಡುವ ಭರವಸೆ ನೀಡಿದೆ.
ಮೊದಲ ಸುತ್ತಿನ ಚುನಾವಣೆಗೆ ಒಂದು ವಾರಕ್ಕಿಂತ ಕಡಿಮೆ ಸಮಯವಿರುವಾಗ, ಬಿಜೆಪಿಯು ’ಸಂಕಲ್ಪ ಪತ್ರ’ ಹೆಸರಿನ ತನ್ನ ಪ್ರಣಾಳಿಕೆಯನ್ನು ಬಿಡುಗಡೆ ಮಾಡಿದ್ದು ಅದರಲ್ಲಿ ಬಿಹಾರದ ಅಂದಾಜು ೧೯ ಲಕ್ಷ ಉದ್ಯೋಗ ಒದಗಿಸುವ ಭರವಸೆ ನೀಡಿತು. ಕೊರೋನಾವೈರಸ್ ಲಸಿಕೆಯನ್ನು ಸರ್ಕಾರಕ್ಕೆ ತಲುಪಿದ ಕೂಡಲೇ ಉಚಿತವಾಗಿ ನೀಡುವುದಾಗಿಯೂ ಪಕ್ಷವು ಭರವಸೆ ಕೊಟ್ಟಿದೆ. ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಗುರುವಾರ ಬಿಜೆಪಿ ಚುನಾವಣಾ ಪ್ರಣಾಳಿಕೆಯನ್ನು ಬಿಡುಗಡೆ ಮಾಡಿದ್ದರು.
ಬಿಜೆಪಿಯು ಮೊದಲ ವರ್ಷದೊಳಗೆ ಶಿಕ್ಷಕರಿಗೆ ಮೂರು ಲಕ್ಷ ಉದ್ಯೋಗ, ಐಟಿ ಕ್ಷೇತ್ರದಲ್ಲಿ ಐದು ಲಕ್ಷ ಉದ್ಯೋಗದ ಭರವಸೆ ನೀಡಿದ್ದು, ಇದಕ್ಕಾಗಿ ’ಮುಂದಿನ ಪೀಳಿಗೆಯ ಐಟಿ ಹಬ್’ ನಿರ್ಮಿಸುವ ಭರವಸೆ ನೀಡಿದೆ. ವೈದ್ಯಕೀಯ ಕ್ಷೇತ್ರದಲ್ಲಿ ಒಂದು ಲಕ್ಷ ಉದ್ಯೋಗ ಮತ್ತು ಕೃಷಿ ಕ್ಷೇತ್ರದಲ್ಲಿ ೧೦ ಲಕ್ಷ ಉದ್ಯೋಗ ನೀಡುವ ಭರವಸೆಯನ್ನೂ ಬಿಜೆಪಿ ನೀಡಿದೆ.
೨೦೨೨ ರ ವೇಳೆಗೆ ಮೂವತ್ತು ಲಕ್ಷ ಪಕ್ಕಾ ಮನೆಗಳು ಮತ್ತು ಕಿರು ಹಣಕಾಸು ಸಂಸ್ಥೆಗಳಲ್ಲಿ (ಮೈಕ್ರೋ ಫೈನಾನ್ಸ್) ಸಂಸ್ಥೆಗಳಲ್ಲಿ ೫೦,೦೦೦ ಕೋಟಿ ರೂ.ಗಳನ್ನು ವಿಸ್ತರಿಸುವ ಮೂಲಕ ಒಂದು ಕೋಟಿ ಮಹಿಳೆಯರನ್ನು ಆರ್ಥಿಕವಾಗಿ ಸ್ವಾವಲಂಬಿಗಳನ್ನಾಗಿ ಮಾಡುವುದು ಬಿಜೆಪಿ ನೀಡಿದ ಇತರ ಪ್ರಮುಖ ಮತದಾನ ಭರವಸೆಗಳಾಗಿವೆ.
ತೇಜಸ್ವಿ ಯಾದವ್ ಅವರ ೧೦ ಲಕ್ಷ ಸರ್ಕಾರದ ಉದ್ಯೋಗದ ಭರವಸೆಯ ಬಗ್ಗೆ ಸುಶೀಲ್ ಮೋದಿ ಬುಧವಾರ ಅಪನಂಬಿಕೆ ವ್ಯಕ್ತಪಡಿಸಿದ್ದರು.
ಇದು ರಾಜ್ಯದಲ್ಲಿ ಸಾಕಷ್ಟು ಆರ್ಥಿಕ ಎಳೆದಾಟಕ್ಕೆ ಕಾರಣವಾಗುತ್ತದೆ. ಪ್ರಸ್ತುತ ಸರ್ಕಾರಿ ನೌಕರರ ವೇತನ ಮತ್ತು ಪಾವತಿ, ೭ ೫೨,೭೩೪ ಕೋಟಿ ರೂಪಾಯಿ ಬೇಕಾಗುತ್ತದೆ. ಇನ್ನೂ ೧೦ ಲಕ್ಷ ಉದ್ಯೋಗಿಗಳನ್ನು ಸೇರಿಸುವುದರಿಂದ ಮೊತ್ತವು ೧.೧೧ ಲಕ್ಷ ಕೋಟಿ ರೂಪಾಯಿಗೆ ಏರುತ್ತದೆ ಎಂದು ಸುಶೀಲ್ ಮೋದಿ ಹೇಳಿದ್ದರು.
"ಪ್ರತಿಪಕ್ಷಗಳು ಕೇವಲ ಸಂಬಳಕ್ಕಾಗಿ ಹೆಚ್ಚು ಖರ್ಚು ಮಾಡಿದರೆ, ಪಿಂಚಣಿ, ವಿದ್ಯಾರ್ಥಿಗಳ ವಿದ್ಯಾರ್ಥಿವೇತನ, ಸೈಕಲ್, ಸಮವಸ್ತ್ರ, ಮಧ್ಯಾಹ್ನ ಬಿಸಿಯೂಟ, ರೈತರ ಸಬ್ಸಿಡಿ, ಮೂಲಸೌಕರ್ಯ ಮತ್ತು ವಿದ್ಯುತ್ ವೆಚ್ಚವನ್ನು ಅವರು ಹೇಗೆ ಪೂರೈಸುತ್ತಾರೆ?’ ಎಂದು ಮೋದಿ ಪ್ರಶ್ನಿಸಿದ್ದರು. ಪ್ರಸ್ತುತ ರಾಜ್ಯ ಬಜೆಟ್ ಕೇವಲ ೨,೧೧,೭೬೧ ಕೋಟಿ ರೂಪಾಯಿಗಳಷ್ಟಿದೆ ಎಂದು ಅವರು ಗಮನಸೆಳೆದಿದ್ದರು. ಸಾಲ ಮರುಪಾವತಿ ಮಾಡಲು ಅಥವಾ ಬಡ್ಡಿ ಪಾವತಿ ಮಾಡಲು ಕೂಡಾ ಇದು ಅವಕಾಶ ನೀಡುವುದಿಲ್ಲ ಎಂದು ಅವರು ಹೇಳಿದ್ದರು.
ಸುಶೀಲ್ ಮೋದಿ ಮಾತ್ರವಲ್ಲ, ಮುಖ್ಯಮಂತ್ರಿ ನಿತೀಶ್ ಕುಮಾರ್ ಕೂಡ ಉದ್ಯೋಗದ ಭರವಸೆಯ ಬಗ್ಗೆ ತೇಜಸ್ವಿ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.
"ಸಂಬಳವನ್ನು ಪಾವತಿಸಲು ನೀವು ಎಲ್ಲಿಂದ ಹಣವನ್ನು ಪಡೆಯುತ್ತೀರಿ? ನೀವು ಜೈಲಿನಲ್ಲಿರುವ ಅದೇ ಹಗರಣದಿಂದ? ಅಥವಾ ನೀವು ನಕಲಿ ಹಣವನ್ನು ಮುದ್ರಿಸುತ್ತೀರಾ?’ ಎಂದು ನಿತೀಶ ಯಾದವ್ ಅವರು ಇತ್ತೀಚೆಗೆ ಗೋಪಾಲಗಂಜ್‌ನಲ್ಲಿ ನಡೆದ ಚುನಾವಣಾ ರ್‍ಯಾಲಿಯಲ್ಲಿ ಪ್ರಶ್ನಿಸಿದ್ದರು.
ತೇಜಸ್ವಿ ಮಂಗಳವಾರ ನಡೆದ ರ್‍ಯಾಲಿಯಲ್ಲಿ ಎನ್‌ಡಿಎಯ ಉನ್ನತ ನಾಯಕರು ತಮ್ಮನ್ನು ಗುರಿಯಾಗಿಸಿಕೊಂಡು ಮಾಡಿದ ಟೀಕೆಗಳಿಗೆ ಪ್ರತಿಕ್ರಿಯಿಸಿದ್ದರು. "೧೫ ವರ್ಷಗಳ ಕಾಲ ಸರ್ಕಾರವನ್ನು ನಡೆಸಿದ ನಂತರ ಮುಖ್ಯಮಂತ್ರಿಗೆ ಅದು ತಿಳಿದಿಲ್ಲ ಎಂದು ತಿಳಿದುಕೊಳ್ಳುವುದು ಬಹಳ ಮನೋರಂಜನೆಯಾಗಿದೆ. ಅವರು ತಮ್ಮನ್ನು ತಾವೇ ನಗೆಪಾಟಲು ಮಾಡಿಕೊಳ್ಳುತ್ತಿದ್ದಾರೆ. ಇದರಲ್ಲಿ ಹೆಚ್ಚಿನವು ಯೋಜಿತ ವೆಚ್ಚವಾಗಿದೆ’ ಎಂದು ಅವರು ಹೇಳಿದ್ದರು.
ಬೋಧನೆ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಖಾಲಿ ಇರುವ ಹುದ್ದೆಗಳತ್ತ ಬೊಟ್ಟು ಮಾಡಿದ ತೇಜಸ್ವಿ,
ಹಗರಣಗಳಲ್ಲಿ ಕಳೆದುಹೋದ ಹಣದ ಬಗ್ಗೆ ಏನು ಎಂದು ಪ್ರಶ್ನಿಸಿದರು. "ಕಳೆದ ವರ್ಷಗಳಲ್ಲಿ, ೬೦ ಹಗರಣಗಳಲ್ಲಿ ಬಿಹಾರದಿಂದ ೩೦,೦೦೦ ಕೋಟಿ ರೂಪಾಯಿ ದೋಚಲಾಗಿದೆ. ಇದು ಬಜೆಟ್‌ನಿಂದ ಬಂದ ಹಣ. ಇದು ಜನರ ಹಣ" ಎಂದು ಅವರು ಹೇಳಿದ್ದರು.
"ಅವರು (ನಿತೀಶ ಕುಮಾರ್) ತಮ್ಮ ವರ್ಚಸ್ಸು ಬೆಳೆಸಿಕೊಳ್ಳಲು ಜಾಹೀರಾತುಗಳಿಗೆ ೫೦೦ ಕೋಟಿ ರೂಪಾಯಿ ಖರ್ಚು ಮಾಡಿದ್ದಾರೆ. ಇವೆಲ್ಲವೂ ಯೋಜಿತ ಬಜೆಟ್‌ನಲ್ಲಿದೆ" ಎಂದು ಅವರು ಹೇಳಿದರು.
No comments:
Post a Comment