ದೆಹಲಿ ಗಡಿಯಲ್ಲೇ ರೈತರ ಪ್ರತಿಭಟನೆ ಮುಂದುವರಿಕೆ

 ದೆಹಲಿ ಗಡಿಯಲ್ಲೇ ರೈತರ ಪ್ರತಿಭಟನೆ ಮುಂದುವರಿಕೆ

ನವದೆಹಲಿ: ರೈತರ ಗುಂಪುಗಳು ದೆಹಲಿಗೆ ಹೋಗದಿರಲು ಮತ್ತು ಸಿಂಗು ಗಡಿಯಲ್ಲಿಯೇ ಮೂರು ಕೃಷಿ ಕಾಯ್ದೆಗಳ ವಿರುದ್ಧ ತಮ್ಮ ಪ್ರತಿಭಟನೆ ಮುಂದುವರೆಸಲು  2020 ನವೆಂಬರ್ 28ರ ಶನಿವಾರ ನಿರ್ಧರಿಸಿದವು.

"ನಾವು ಇಲ್ಲಿಯೇ ನಮ್ಮ ಪ್ರತಿಭಟನೆಯನ್ನು ಮುಂದುವರೆಸುತ್ತೇವೆ ಮತ್ತು ಬೇರೆಲ್ಲಿಗೂ ಹೋಗಬಾರದು ಎಂದು ನಿರ್ಧರಿಸಲಾಗಿದೆ. ನಮ್ಮ ಕಾರ್ಯತಂತ್ರವನ್ನು ಚರ್ಚಿಸಲು ನಾವು ಪ್ರತಿದಿನ ಬೆಳಿಗ್ಗೆ ೧೧ ಗಂಟೆಗೆ ಭೇಟಿಯಾಗುತ್ತೇವೆ’ ಎಂದು ಭಾರತೀಯ ಕಿಸಾನ್ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಹರಿಂದರ್ ಸಿಂಗ್ ಸುದ್ದಿ ಸಂಸ್ಥೆಗೆ ತಿಳಿಸಿದರು.

ಸಂಸತ್ತಿನ ಮುಂಗಾರು ಅಧಿವೇಶನದಲ್ಲಿ ಅಂಗೀಕರಿಸಿದ ಮೂರು ಕೃಷಿ ಮಸೂದೆಗಳನ್ನು ಕೇಂದ್ರ ರದ್ದುಪಡಿಸಬೇಕೆಂದು ಒತ್ತಾಯಿಸಿ ಪಂಜಾಬ್ ಮತ್ತು ಹರಿಯಾಣದ ರೈತರು ನವೆಂಬರ್ ೨೫ ರಂದು ದೆಹಲಿಯತ್ತ ಮೆರವಣಿಗೆ ಪ್ರಾರಂಭಿಸಿದ್ದರು. ಅವರು ಬ್ಯಾರಿಕೇಡ್‌ಗಳನ್ನು ಮುರಿದು ಶುಕ್ರವಾರ ಗಡಿಯಲ್ಲಿ ಪೊಲೀಸರೊಂದಿಗೆ ಘರ್ಷಣೆ ನಡೆಸಿ ದೆಹಲಿ ಕಡೆಗೆ ಮೆರವಣಿಗೆ ಮಾಡುವುದಾಗಿ ಪ್ರತಿಜ್ಞೆ ಮಾಡಿದ್ದರು.

ಈ ಮಧ್ಯೆ, ದೆಹಲಿಯ ಬುರಾರಿಯ ಮೈದಾನದಲ್ಲಿ ಶಾಂತಿಯುತ ಪ್ರದರ್ಶನಗಳನ್ನು ನಡೆಸಲು ದೆಹಲಿ ಪೊಲೀಸರು ಶುಕ್ರವಾರ ಅನುಮತಿ ನೀಡಿದ್ದರು.

‘ಶಾಂತಿಯುತ ಪ್ರತಿಭಟನೆ ನಡೆಸಲು ಅನುಮತಿ ಈಗಾಗಲೇ ನೀಡಲಾಗಿದೆ. ಪ್ರತಿಭಟನಾಕಾರರಿಗೆ ಬುರಾರಿ ಮೈದಾನಕ್ಕೆ ತೆರಳಲು ಅನುಕೂಲ ಒದಗಿಸಲು ದೆಹಲಿ ಪೊಲೀಸರು ಸಜ್ಜಾಗಿದ್ದಾರೆ. ಪ್ರತಿಭಟನಾಕಾರರು ಜವಾಬ್ದಾರಿಯುತವಾಗಿ ವರ್ತಿಸುವಂತೆ ನಾವು ವಿನಂತಿಸುತ್ತೇವೆ’ ಎಂದು ದೆಹಲಿ ಉತ್ತರ ಜಿಲ್ಲಾ ಪೊಲೀಸ್ ಡೆಪ್ಯೂಟಿ ಕಮೀಷನರ್ ಗೌರವ್ ಶರ್ಮಾ ಅವರನ್ನು ಸುದ್ದಿ ಸಂಸ್ಥೆ ಉಲ್ಲೇಖಿಸಿದೆ.

ಇದಕ್ಕೂ ಮುನ್ನ ಶನಿವಾರ ಕೇಂದ್ರ ಕೃಷಿ ಸಚಿವ ನರೇಂದ್ರ ಸಿಂಗ್ ತೋಮರ್ ಅವರು ರೈತರು ತಮ್ಮ ಆಂದೋಲನಗಳನ್ನು ನಿಲ್ಲಿಸಿ ಡಿಸೆಂಬರ್ ೩ ರಂದು ಕೇಂದ್ರದ ಜೊತೆಗೆ ತಾವು ಎದುರಿಸುತ್ತಿರುವ ಸಮಸ್ಯೆಗಳ ಬಗ್ಗೆ ಚರ್ಚಿಸುವಂತೆ ವಿನಂತಿಸಿಕೊಂಡರು

‘ಅವರ ಸಮಸ್ಯೆಗಳನ್ನು ಪರಿಹರಿಸಲು ರೈತ ಸಂಘಗಳೊಂದಿಗೆ ಮಾತುಕತೆಗೆ ಸರ್ಕಾರ ಸಿದ್ಧವಾಗಿದೆ. ನಾವು ಅವರನ್ನು ಡಿಸೆಂಬರ್ ೩ ರಂದು ಮಾತುಕತೆಗೆ ಆಹ್ವಾನಿಸಿದ್ದೇವೆ. ಅವರು ಸಭೆಗೆ ಬರುತ್ತಾರೆ ಎಂದು ನಾನು ಭಾವಿಸುತ್ತೇನೆ. ರಾಜಕೀಯ ಪಕ್ಷಗಳು ರೈತರ ಹೆಸರಿನಲ್ಲಿ ರಾಜಕೀಯ ಆಡಬಾರದು ಎಂದು ನಾನು ಒತ್ತಾಯಿಸುತ್ತೇನೆ’ ಎಂದು ತೋಮರ್ ಹೇಳಿದರು.

ಅಮರೀಂದರ್ - ಖಟ್ಟರ್ ವಾಗ್ಯುದ್ಧ

ಈ ಮಧ್ಯೆ, ರೈತ ಚಳವಳಿಗೆ ಸಂಬಂಧಿಸಿದಂತೆ ಪಂಜಾಬ್ ಮುಖ್ಯಮಂತ್ರಿ ಕ್ಯಾಪ್ಟನ್ ಅಮರೀಂದರ್ ಸಿಂಗ್ ಮತ್ತು ಹರಿಯಾಣ ಮುಖ್ಯಮಂತ್ರಿ ಮನೋಹರಲಾಲ್ ಖಟ್ಟರ್  2020 ನವೆಂಬರ್ 28ರ ಶನಿವಾರ  ವಾಗ್ಯುದ್ಧಕ್ಕೆ ಇಳಿದರು.

’ಅಮರಿಂದರ್ ಖಲಿಸ್ತಾನಿಯೇ?’ ಎಂಬುದಾಗಿ ಪ್ರಶ್ನಿಸುವ ಮೂಲಕ ಅಮರೀಂದರ್ ಸಿಂಗ್ ಅವರು ’ಪ್ರತಿಭಟನೆಯಲ್ಲಿ ಖಲಿಸ್ತಾನಿಗಳು ಇರಬಹುದು’ ಎಂಬ ಹರಿಯಾಣ ಮುಖ್ಯಮಂತ್ರಿ ಮನೋಹರಲಾಲ್ ಖಟ್ಟರ್ ಹೇಳಿಕೆಯನ್ನು ವಿರೋಧಿಸಿದರು.

’ರೈತರ ಪ್ರತಿಭಟನೆಯಲ್ಲಿ ಯಾವುದೇ ರಾಜಕೀಯ ಹಸ್ತಕ್ಷೇಪ ಇಲ್ಲ.  ಕೇಂದ್ರವು ಇತ್ತೀಚೆಗೆ ಜಾರಿಗೆ ತಂದ ಕೃಷಿ ಕಾನೂನುಗಳನ್ನು ವಿರೋಧಿಸಿ ಸಾವಿರಾರು ರೈತರು ದೆಹಲಿಯ ಬುರಾರಿ ಮೈದಾನದಲ್ಲಿ ಜಮಾಯಿಸಿದ್ದರಿಂದ, ಅವರ ಜೊತೆಗೆ ನಿಲ್ಲುವುದು ನಮ್ಮ ಕರ್ತವ್ಯ’ ಎಂದು ಪಂಜಾಬ್ ಮುಖ್ಯಮಂತ್ರಿ ಹೇಳಿದರು.

ರೈತರು ತಮ್ಮ ಜಮೀನು ಮತ್ತು ಹಳೆಯ ವ್ಯವಸ್ಥೆಯನ್ನು ಕಳೆದುಕೊಳ್ಳುವ ಭಯದಲ್ಲಿದ್ದಾರೆ ಮತ್ತು ಕೈಗಾರಿಕೋದ್ಯಮಿಗಳೊಂದಿಗೆ ಹೇಗೆ ವ್ಯವಹರಿಸಬೇಕೆಂದು ಅವರಿಗೆ ತಿಳಿದಿಲ್ಲ ಎಂದು ಸಿಂಗ್ ಹೇಳಿದರು.

ತಮ್ಮ ಉತ್ಪನ್ನಗಳ ಕನಿಷ್ಠ ಬೆಂಬಲ ಬೆಲೆ (ಎಂಎಸ್‌ಪಿ) ಕೊನೆಗೊಳ್ಳುವುದಿಲ್ಲ ಎಂದು ಕೇಂದ್ರ ಸರ್ಕಾರ ಭರವಸೆ ನೀಡಿದ್ದರೂ, ರೈತರಿಗೆ ಕಾನೂನು ಮೂಲಕ ಭರವಸೆ ಬೇಕು ಎಂದು ಅವರು ನುಡಿದರು.

"ಎಂಎಸ್‌ಪಿಗೆ ಒಂದು ಷರತ್ತು ಹಾಕಲು ಏನು ಸಮಸ್ಯೆ ಇದೆ? ಎಂಎಸ್‌ಪಿಯನ್ನು ರಕ್ಷಿಸಲಾಗುವುದು ಮತ್ತು ಮಂಡಿ ವ್ಯವಸ್ಥೆಯನ್ನು ರಕ್ಷಿಸಲಾಗುವುದು ಎಂದು ಅವರು ಏಕೆ ಹೇಳಲು ಸಾಧ್ಯವಿಲ್ಲ ... ಇಲ್ಲಿ ಸಮಸ್ಯೆ ಏನು?" ಎಂದು ಕ್ಯಾಪ್ಟನ್ ಸಂದರ್ಶನ ಒಂದರಲ್ಲಿ ಪ್ರಶ್ನಿಸಿದರು.

ಹರಿಯಾಣದ ಮುಖ್ಯಮಂತ್ರಿ ಮನೋಹರ್ ಲಾಲ್ ಖಟ್ಟರ್ ಅವರ ಆರೋಪಗಳಿಗೆ ಪ್ರತಿಕ್ರಿಯಿಸಿದ ಸಿಂಗ್, ರಾಜ್ಯ ಪೊಲೀಸರಿಂದ ಹಲ್ಲೆಗೆ ಒಳಗಾದ ರೈತರ ಕ್ಷಮೆ ಯಾಚಿಸುವವರೆಗೂ ತಾವು ಖಟ್ಟರ್ ಜೊತೆ ಮಾತನಾಡುವುದಿಲ್ಲ ಎಂದು ಹೇಳಿದರು.

"ಅವರು ನಮ್ಮ ರೈತರನ್ನು ಏಕೆ ತಡೆಯುತ್ತಿದ್ದಾರೆ? ಅವರು ಯಾಕೆ ಅವರ ಮೇಲೆ ಅಶ್ರುವಾಯು ಶೆಲ್  ಹಾರಿಸಬೇಕಾಗಿತ್ತು? ನಾನು ಪ್ರಧಾನಿ ಮತ್ತು ಕೃಷಿ ಸಚಿವರೊಂದಿಗೆ ಮಾತನಾಡಿದ್ದೇನೆ, ಹಾಗಿರುವಾಗ ನನಗೆ ಖಟ್ಟರ್ ಅವರೊಂದಿಗೆ ಮಾತನಾಡಲು ಸಾಧ್ಯವಿಲ್ಲವೇ? ಅವರು ವಿಫಲರಾಗಿದ್ದಾರೆ ಮತ್ತು ಈಗ ಇದಕ್ಕೆ ನನ್ನನ್ನು ದೂಷಿಸುತ್ತಿದ್ದಾರೆ" ಸಿಂಗ್ ಹೇಳಿದರು.

"ಖಟ್ಟರ್ ಹೇಳುವ ವಿಚಾರದ ಬಗ್ಗೆ ಯಾರು ಕಾಳಜಿ ವಹಿಸುತ್ತಾರೆ? ಈ ಪ್ರತಿಭಟನೆಗಳು ಸ್ವಯಂಪ್ರೇರಿತವಾಗಿವೆ. ಅವರು ವಿಫಲರಾಗಿದ್ದಾರೆ ಎಂಬ ಕಾರಣಕ್ಕಾಗಿ ಅವರು ನಮ್ಮ ಮೇಲೆ ಆರೋಪಗಳನ್ನು ಹಾಕುತ್ತಿದ್ದಾರೆ. ಅವರು ನನ್ನ ಕಡೆ ಗುರಿ ಇಟ್ಟು ಗುಂಡು ಹಾರಿಸುತ್ತಿದ್ದಾರೆ" ಎಂದು ಕ್ಯಾಪ್ಟನ್ ಹೇಳಿದರು.

ಪರಿಸ್ಥಿತಿಯನ್ನು ನಿಭಾಯಿಸುವಲ್ಲಿ ವಿಫಲರಾದ ಕಾರಣ ಖಟ್ಟರ್ ಅವರನ್ನು ದೂಷಿಸಿದ ಸಿಂಗ್, ಹರಿಯಾಣ ಮುಖ್ಯಮಂತ್ರಿ ಸುಳ್ಳು ಹೇಳುತ್ತಿದ್ದಾರೆ. ನನಗೆ ಅವರಿಂದ ಯಾವುದೇ ಕರೆ ಅಥವಾ ಸಂದೇಶ ಬಂದಿಲ್ಲ ಎಂದು ಹೇಳಿದರು.

"ಪರಿಸ್ಥಿತಿ ಎಷ್ಟೇ ಕೆಟ್ಟದಾದರೂ ಅದು ಮಾತುಕತೆಯೊಂದಿಗೆ ಮಾತ್ರ ಕೊನೆಗೊಳ್ಳುತ್ತದೆ. ಅವರು ದೆಹಲಿಗೆ ಬರುತ್ತಿದ್ದಾರೆಂದು ಸರ್ಕಾರಕ್ಕೆ ತಿಳಿದಿತ್ತು, ಅವರು ಈ ವಿಷಯವನ್ನು ಬಗೆಹರಿಸಬಹುದಿತ್ತು" ಎಂದು ಸಿಂಗ್ ನುಡಿದರು.

ಪ್ರತಿಭಟನೆಯಲ್ಲಿ "ಖಲಿಸ್ತಾನಿ" ಹಸ್ತಕ್ಷೇಪ ಕುರಿತ ಖಟ್ಟರ್ ಅವರ ಆರೋಪವನ್ನು ಸಿಂಗ್ ಟೀಕಿಸಿದರು, "ಅಮರಿಂದರ್ ಖಲಿಸ್ತಾನಿಯೇ? ಅವರು ಸಮಸ್ಯೆಯನ್ನು ಎದುರಿಸಲು ಸಾಧ್ಯವಾಗದಿದ್ದಾಗ, ಅವರು ಇತರರನ್ನು ದೂಷಿಸಲು ಪ್ರಾರಂಭಿಸುತ್ತಾರೆ ... ಈ ಆರೋಪಗಳು (ಹಸ್ತಕ್ಷೇಪ) ಎಲ್ಲವೂ ತಪ್ಪು. " ಎಂದು ಕ್ಯಾಪ್ಟನ್ ನುಡಿದರು.

"ಯಾವುದೇ ರಾಜಕೀಯ ಪಕ್ಷ ಪ್ರತಿಭಟನೆಯಲ್ಲಿ ಭಾಗಿಯಾಗಿಲ್ಲ. ಈ ರೈತರು ಹರಿಯಾಣ ಮತ್ತು ಪಂಜಾಬಿಗೆ  ಸೇರಿದವರು. ಪಂಜಾಬಿನಿಂದ ಯಾವ ಗುಂಪುಗಳು ಮೆರವಣಿಗೆ ನಡೆಸಿವೆ ಎಂಬುದು ನನಗೆ ತಿಳಿದಿದೆ. ಆದರೆ ಖಟ್ಟರ್ ಅವರ ರಾಜ್ಯದ ರೈತರಿಗೆ ಏನಾಗುತ್ತಿದೆ ಎಂಬುದು ಸ್ಪಷ್ಟವಾಗಿ ತಿಳಿದಿಲ್ಲ. ನಾನು ಇತ್ಯರ್ಥವನ್ನು ಬಯಸುತ್ತೇನೆ. ನನ್ನ ರೈತರು ಚಳಿಯಲ್ಲಿ ತೊಂದರೆ ಅನುಭವಿಸಲು ನಾನು ಬಯಸುವುದಿಲ್ಲ’ ಎಂದು ಪಂಜಾಬ್ ಮುಖ್ಯಮಂತ್ರಿ ಹೇಳಿದರು.

ಇದಕ್ಕೆ ಮುನ್ನ ಹರಿಯಾಣ ಮುಖ್ಯಮಂತ್ರಿ ಹರಿಯಾಣದ ರೈತರು ಪ್ರತಿಭಟಿಸುತ್ತಿಲ್ಲ. ಈ ಪ್ರತಿಭಟನೆಯಲ್ಲಿ ಖಲಿಸ್ತಾನಿಗಳು ಸೇರಿರುವ ಸಾಧ್ಯತೆ ಇದೆ’ ಎಂದು ಹೇಳಿದ್ದರು.