ವಿಶ್ವದ ಅತಿ ಎತ್ತರದ ಸೇತುವೆ ಮೇಲೆ ವಂದೇ ಭಾರತ್ ಓಡಾಟ ಶುರು

 ವಿಶ್ವದ ಅತಿ ಎತ್ತರದ ಸೇತುವೆ ಮೇಲೆ ವಂದೇ ಭಾರತ್ ಓಡಾಟ ಶುರು

ಜಮ್ಮು: ವಿಶ್ವದ ಅತಿ ಎತ್ತರದ ಕಮಾನು ಸೇತುವೆಯಾದ ಚೆನಾಬ್‌ ಸೇತುವೆ ಮೇಲೆ ಸಾಗುವ ಕತ್ರಾ ಮತ್ತು ಶ್ರೀನಗರ ನಡುವಣ ವಂದೇ ಭಾರತ್ ರೈಲುಗಳ ವಾಣಿಜ್ಯ ಕಾರ್ಯಾಚರಣೆಯನ್ನು ಉತ್ತರ ರೈಲ್ವೆ ೨೦೨೫ ಜೂನ್‌ ೭ರ ಶನಿವಾರ ಆರಂಭಿಸಿದೆ.

೨೦೨೫ ಜೂನ್‌ ಜೂನ್ 6 ರ ಶುಕ್ರವಾರ ಪ್ರಧಾನಿ ನರೇಂದ್ರ ಮೋದಿ ಅವರು ಕತ್ರಾದಲ್ಲಿ ಹಸಿರು ನಿಶಾನೆ ತೋರಿದ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲು ಕಾಶ್ಮೀರವನ್ನು ದೇಶದ ಉಳಿದ ಭಾಗಗಳೊಂದಿಗೆ ರೈಲು ಮೂಲಕ ಸಂಪರ್ಕಿಸುತ್ತದೆ.

ಕತ್ರಾದಿಂದ ಬಾರಾಮುಲ್ಲಾಗೆ ಅಥವಾ ಬಾರಾಮುಲ್ಲಾದಿಂದ ಕತ್ರಾಗೆ ರೈಲುಗಳನ್ನು ಹತ್ತಿದ ಪ್ರಯಾಣಿಕರು ಅಪಾರ ಉತ್ಸಾಹ ವ್ಯಕ್ತಪಡಿಸಿದರು, ಅನೇಕರು ರೈಲಿನಲ್ಲಿ ಕಾಶ್ಮೀರಕ್ಕೆ ಪ್ರಯಾಣಿಸುವ ಅವಕಾಶಕ್ಕಾಗಿ ಕಾತರದಿಂದ ಕಾಯುತ್ತಿದ್ದೆವು ಎಂದು ಹೇಳಿದರು.

ರೈಲುಗಳಲ್ಲಿ ಸಂಚರಿಸಿದ ಪ್ರಯಾಣಿಕರು ʼಭಾರತ್‌ ಮಾತಾ ಕೀ ಜಯ್‌ʼ, ʼವಂದೇ ಮಾತರಂʼ ಘೋಷಣೆಗಳನ್ನು ಕೂಗಿ ಹರ್ಷ ವ್ಯಕ್ತ ಪಡಿಸುತ್ತಿದ್ದ ವಿಡಿಯೋ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.

ಸಂಜೆಯ ವೇಳೆಗೆ ರೈಲುಗಳು ತಮ್ಮ ಗಮ್ಯಸ್ಥಾನಗಳನ್ನು ತಲುಪಿದ್ದರಿಂದ ಮೊದಲ ದಿನದ ವಾಣಿಜ್ಯ ಕಾರ್ಯಾಚರಣೆ ಸರಾಗವಾಗಿ ನಡೆಯಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸಾರ್ವಜನಿಕರ ಉತ್ಸಾಹ ಹೆಚ್ಚಾಗಿದ್ದುದರಿಂದ ರೈಲು ಉದ್ಘಾಟನೆಯಾದ ಕೆಲವೇ ಗಂಟೆಗಳಲ್ಲಿ ಹೆಚ್ಚಿನ ಸೀಟುಗಳು ಬುಕ್ ಆಗಿದ್ದವು ಎಂದು ಅಧಿಕಾರಿಗಳೂ ಹೇಳಿದರು.

ಉತ್ತರ ರೈಲ್ವೆಯ ಪ್ರಕಾರ, ಎರಡು ವಂದೇ ಭಾರತ್ ರೈಲುಗಳು ಕತ್ರಾ ಮತ್ತು ಶ್ರೀನಗರ ನಡುವೆ ಹಗಲಿನಲ್ಲಿ ನಾಲ್ಕು ಟ್ರಿಪ್‌ಗಳನ್ನು ಮಾಡಿದ್ದವು.

ಈ ರೈಲಿನಲ್ಲಿ ಚೇರ್ ಕಾರ್ (ಸಿಸಿ) ಮತ್ತು ಎಕ್ಸಿಕ್ಯುಟಿವ್ ಕ್ಲಾಸ್ (ಇಸಿ) ಎಂಬ ಎರಡು ಪ್ರಯಾಣ ತರಗತಿಗಳಿದ್ದು, ಟಿಕೆಟ್‌ಗಳ ಬೆಲೆ ಕ್ರಮವಾಗಿ 715 ಮತ್ತು 1,320 ರೂ. ಎಂದು ಅಧಿಕಾರಿಗಳು ಹೇಳಿದರು.

ಕತ್ರಾ ಎಲ್ಲಿದೆ?

ಕತ್ರಾ ಎಂಬುದು ಭಾರತದ ಕೇಂದ್ರಾಡಳಿತ ಪ್ರದೇಶವಾದ ಜಮ್ಮು ಮತ್ತು ಕಾಶ್ಮೀರದ ರಿಯಾಸಿ ಜಿಲ್ಲೆಯ ಒಂದು ನಗರ ಮತ್ತು ತಹಸಿಲ್ ಆಗಿದ್ದು, ಇದು ತ್ರಿಕೂಟ ಪರ್ವತಗಳ ಬುಡದಲ್ಲಿದೆ, ಅಲ್ಲಿ ವೈಷ್ಣೋದೇವಿಯ ದೇವಾಲಯವಿದೆ. ಕತ್ರಾವು ರಿಯಾಸಿ ಪಟ್ಟಣದಿಂದ 24 ಕಿಮೀ (15 ಮೈ) ದೂರದಲ್ಲಿದೆ, ಜಮ್ಮು ನಗರದಿಂದ 42 ಕಿಮೀ (26 ಮೈ) ಮತ್ತು ರಾಷ್ಟ್ರ ರಾಜಧಾನಿ ನವದೆಹಲಿಯ ಉತ್ತರಕ್ಕೆ ಸುಮಾರು 685 ಕಿಮೀ (426 ಮೈ) ದೂರದಲ್ಲಿದೆ ಮತ್ತು ಮಾತಾ ವೈಷ್ಣೋದೇವಿ ದೇವಸ್ಥಾನಕ್ಕೆ ಭೇಟಿ ನೀಡುವ ಯಾತ್ರಿಕರಿಗೆ ನೆಲೆಯಾಗಿದೆ.

ಬಾರಾಮುಲ್ಲಾ ಎಲ್ಲಿದೆ?

ಕಾಶ್ಮೀರಿ ಭಾಷೆಯಲ್ಲಿ ವರ್ಮುಲ್ (ಕಾಶ್ಮೀರಿ ಉಚ್ಚಾರಣೆ: [ʋarmul] ) ಎಂಬುದಾಗಿ ಕರೆಯಲ್ಪಡುವ ಬಾರಾಮುಲ್ಲಾ,  ಜಮ್ಮು ಮತ್ತು ಕಾಶ್ಮೀರದ ಬಾರಾಮುಲ್ಲಾ ಜಿಲ್ಲೆಯ ಒಂದು ನಗರ ಮತ್ತು ಪುರಸಭೆ. ಇದು ಬಾರಾಮುಲ್ಲಾ ಜಿಲ್ಲೆಯ ಆಡಳಿತ ಕೇಂದ್ರ. ಇದು ಜಮ್ಮು ಮತ್ತು ಕಾಶ್ಮೀರದ ಬೇಸಿಗೆಯ ರಾಜಧಾನಿಯಾದ ಶ್ರೀನಗರದಿಂದ ಕೆಳಕ್ಕೆ ಝೀಲಂ ನದಿಯ ದಡದಲ್ಲಿದೆ . ಬಾರಾಮುಲ್ಲಾ ಪಟ್ಟಣವನ್ನು ಮೊದಲು ಕಾಶ್ಮೀರದ ಗೇಟ್‌ವೇ ಎಂಬುದಾಗಿ ಕರೆಯಲಾಗುತ್ತಿತ್ತು, ಝೀಲಂ ಕಣಿವೆಯ ಬಂಡಿ ರಸ್ತೆಯ ಮೂಲಕ ಕಾಶ್ಮೀರ ಕಣಿವೆಗೆ ಬರುವ ಸರಕುಗಳಿಗೆ ಪ್ರಮುಖ ವಿತರಣಾ ಕೇಂದ್ರವಾಗಿ ಕಾರ್ಯನಿರ್ವಹಿಸುತ್ತಿತ್ತು. ಇದು ಪೀರ್ ಪಂಜಾಲ್ ಶ್ರೇಣಿಯ ತಪ್ಪಲಿನಲ್ಲಿರುವ ಕಾಶ್ಮೀರ ಕಣಿವೆಯೊಳಗೆ ಇದೆ. ಬಾರಾಮುಲ್ಲಾ ಪಟ್ಟಣವನ್ನು ಮೊದಲು ವರಾಹಮೂಲ ಎಂದು ಕರೆಯಲಾಗುತ್ತಿತ್ತು.

ಚೆನಾಬ್‌ ಸೇತುವೆ ಎಲ್ಲಿದೆ? ವಿಶೇಷತೆ ಏನು?

ಚೆನಾಬ್ ಸೇತುವೆಯು, ಜಮ್ಮು- ಕಾಶ್ಮೀರದಲ್ಲಿ ಅಂಜಿ ನದಿಯ ಮೇಲೆ ನಿರ್ಮಿಸಲಾದ ದೇಶದ ಮೊದಲ ಕೇಬಲ್-ಸ್ಟೇಡ್ ರೈಲು ಸೇತುವೆ. ಜಮ್ಮು-ಕಾಶ್ಮೀರದ ರಿಯಾಸಿ ಜಿಲ್ಲೆಯಲ್ಲಿ ವಿಶ್ವದ ಅತಿ ಎತ್ತರದ ರೈಲ್ವೆ ಕಮಾನು ಸೇತುವೆ ಇದು. ಇದರ ಎತ್ತರ ನದಿಯಿಂದ 359 ಮೀಟರ್.

ವಾಸ್ತುಶಿಲ್ಪದ ಅದ್ಭುತ ಚೆನಾಬ್ ರೈಲು ಸೇತುವೆಯು ವಿಶ್ವದ ಅತಿ ಎತ್ತರದ ರೈಲ್ವೆ ಕಮಾನು ಸೇತುವೆಯಾಗಿದೆ. ಇದು ಭೂಕಂಪ ಮತ್ತು ಪ್ರಬಲ ಗಾಳಿಯ ಪರಿಸ್ಥಿತಿಗಳನ್ನು ತಡೆದುಕೊಳ್ಳುವಂತೆ ವಿನ್ಯಾಸಗೊಳಿಸಲಾದ 1,315 ಮೀಟರ್ ಉದ್ದದ ಉಕ್ಕಿನ ಕಮಾನು ಸೇತುವೆ.  ಇದು ಜಮ್ಮು-ಶ್ರೀನಗರ ನಡುವಿನ ಸಂಪರ್ಕವನ್ನು ಹೆಚ್ಚಿಸುವುದು.

ಚೆನಾಬ್‌ ಸೇತುವೆಯ ಮೇಲೆ ಚಲಿಸುವ ವಂದೇ ಭಾರತ್ ರೈಲು ಮೂಲಕ, ಕತ್ರಾ ಮತ್ತು ಶ್ರೀನಗರ ನಡುವಣ ಪಯಣ ಸುಮಾರು ೩ ಗಂಟೆಯಷ್ಟು ತಗ್ಗಲಿದೆ.

ವಿಶ್ವದ ಅತಿ ಎತ್ತರದ ಚೆನಾಬ್‌ ಸೇತುವೆ ಇಲ್ಲಿದೆ ನೋಡಿ:

ಹಬ್ಬಗಳ ಕಾಲದಲ್ಲಿ ೧೯೬ ವಿಶೇಷ ರೈಲುಗಳ ಓಡಾಟ

 ಹಬ್ಬಗಳ ಕಾಲದಲ್ಲಿ ೧೯೬ ವಿಶೇಷ ರೈಲುಗಳ ಓಡಾಟ

ನವದೆಹಲಿ: ಹಬ್ಬಗಳ ಋತುವಿನ ಸಲುವಾಗಿ ಅಕ್ಟೋಬರ್ ೨೦ ಮತ್ತು ನವೆಂಬರ್ ೩೦ ರ ನಡುವೆ ೧೯೬ ಉತ್ಸವ ವಿಶೇಷ ರೈಲುಗಳನ್ನು ಓಡಿಸುವುದಾಗಿ ಭಾರತೀಯ ರೈಲ್ವೆ 2020 ಅಕ್ಟೋಬರ್ 13ರ ಮಂಗಳವಾರ ಪ್ರಕಟಿಸಿತು.

ಮುಂಬರುವ ಹಬ್ಬದ ಅವಧಿಯಲ್ಲಿ ಪ್ರಯಾಣಿಕರ ದಟ್ಟಣೆಯನ್ನು ನಿರೀಕ್ಷಿಸುತ್ತಿರುವುದರಿಂದ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ರೈಲ್ವೆ ಸಚಿವಾಲಯ ಪ್ರಕಟಣೆಯಲ್ಲಿ ತಿಳಿಸಿತು.

ದುರ್ಗಾ ಪೂಜೆ, ದಸರಾ, ದೀಪಾವಳಿ ಮತ್ತು ಛಾತ್  ಪೂಜೆಯ ಹಿನ್ನೆಲೆಯಲ್ಲಿ ಮುಂದಿನ ರಜಾದಿನಗಳಲ್ಲಿ ಹೆಚ್ಚುತ್ತಿರುವ ಬೇಡಿಕೆಯನ್ನು ಪೂರೈಸಲು ಕೋಲ್ಕತಾ, ಪಾಟ್ನಾ, ವಾರಣಾಸಿ, ಲಕ್ನೋ ಮುಂತಾದ ಸ್ಥಳಗಳಿಗೆ ವಿಶೇಷ ರೈಲುಗಳನ್ನು ಓಡಿಸಲಾಗುವುದು ಎಂದು ಅದು ಹೇಳಿತು.

"ಈ ಸೇವೆಗಳನ್ನು ಸಾಧ್ಯವಾದಷ್ಟು ಕನಿಷ್ಠ ೫೫ ಕಿ.ಮೀ ವೇಗದಲ್ಲಿ ನಿರ್ವಹಿಸಬೇಕು ಇದರಿಂದ ಅವು ಸೂಪರ್‌ಫಾಸ್ಟ್ ಸೇವೆಗಳಾಗಿವೆ. ಈ ’ಹಬ್ಬದ ವಿಶೇಷ’ ಸೇವೆಗಳಿಗೆ ಅನ್ವಯವಾಗುವ ಶುಲ್ಕವು ವಿಶೇಷ ರೈಲುಗಳಿಗೆ ಅನ್ವಯವಾಗಲಿದೆ ಎಂದು ಹೇಳಿಕೆ ತಿಳಿಸಿದೆ.

ರೈಲ್ವೆಯು ಪ್ರಸ್ತುತ ಎಲ್ಲಾ ಸಾಮಾನ್ಯ ಪ್ರಯಾಣಿಕ ರೈಲುಗಳನ್ನು ಅನಿರ್ದಿಷ್ಟವಾಗಿ ಸ್ಥಗಿತಗೊಳಿಸಿದೆ. ಮಾರ್ಚ್ ೨೨ ರಿಂದ ನಿಯಮಿತ ರೈಲುಗಳನ್ನು ಸ್ಥಗಿತಗೊಳಿಸಲಾಗಿದೆ.

ಮೇ ೧೨ ರಂದು ದೆಹಲಿಯನ್ನು ದೇಶದ ವಿವಿಧ ಭಾಗಗಳೊಂದಿಗೆ ಸಂಪರ್ಕಿಸುವ ೧೫ ಜೋಡಿ ಪ್ರೀಮಿಯಂ ರಾಜಧಾನಿ ವಿಶೇಷ ರೈಲುಗಳ ಕಾರ್ಯಾಚರಣೆಯನ್ನು ರೈಲ್ವೇ ಇಲಾಖೆ ಪ್ರಾರಂಭಿಸಿತು ಮತ್ತು ಜೂನ್ ೧ ರಂದು ೧೦೦ ಜೋಡಿ ದೂರದ-ರೈಲುಗಳನ್ನು ಪ್ರಾರಂಭಿಸಿತು. ಸೆಪ್ಟೆಂಬರ್ ೧೨ರಂದು ಹೆಚ್ಚುವರಿಯಾಗಿ ೮೦ ರೈಲುಗಳನ್ನು ಸಹ ಪ್ರಾರಂಭಿಸಿತ್ತು.

ರೈಲು ಪುನಾರಂಭಕ್ಕೆ ೪ ರಾಜ್ಯಗಳ ವಿರೋಧ, ಚೇತರಿಕೆ ಪ್ರಮಾಣ ಹೆಚ್ಚಳ

ರೈಲು ಪುನಾರಂಭಕ್ಕೆ ೪ ರಾಜ್ಯಗಳ ವಿರೋಧ,  ಚೇತರಿಕೆ ಪ್ರಮಾಣ ಹೆಚ್ಚಳ

ನವದೆಹಲಿ: ಕೋವಿಡ್ -೧೯ ಪ್ರಸರಣ ತಡೆಯ ಸಲುವಾಗಿ ಸ್ಥಗಿತಗೊಳಿಸಲಾಗಿದ್ದ ರೈಲು ಸೇವೆಯ ಪುನಾರಂಭವನ್ನು ಕನಿಷ್ಠ ನಾಲ್ಕು ರಾಜ್ಯಗಳು ವಿರೋಧಿಸಿದ್ದು, ಆಂಧ್ರ ಪ್ರದೇಶ, ತೆಲಂಗಾಣ, ತಮಿಳುನಾಡು ಮತ್ತು ಛತ್ತೀಸ್ ಗಢ ರಾಜ್ಯಗಳ ಮುಖ್ಯಮಂತ್ರಿಗಳು  2020 ಮೇ 11ರ ಸೋಮವಾರ ಪ್ರಧಾನಿ ನರೇಂದ್ರ ಮೋದಿ ಅವರ ಜೊತೆಗಿನ ವಿಡಿಯೋ ಸಂವಾದದಲ್ಲಿ ರೈಲು ಸೇವೆ ಪುನಾರಂಭಕ್ಕೆ ವಿರೋಧ ವ್ಯಕ್ತ ಪಡಿಸಿದರು.

ರೈಲು ಸೇವೆ ಪುನಾರಂಭದಿಂದ ಶಂಕಿತ ಕೋವಿಡ್-೧೯ ಪ್ರಕರಣಗಳನ್ನು ಪರೀಕ್ಷಿಸಲು, ಪತ್ತೆ ಹಚ್ಚಲು ಮತ್ತು ಪ್ರತ್ಯೇಕಿಸಲು ಅತ್ಯಂತ ಕಠಿಣವಾದೀತು ಮತ್ತು ಇದರ ಪರಿಣಾಮವಾಗಿ ದೇಶದಲ್ಲಿ ಅರಾಜಕತೆ ಸೃಷ್ಟಿಯಾದೀತು ಎಂದು ಎಚ್ಚರಿಸಿದ ಈ ಮುಖ್ಯಮಂತ್ರಿಗಳು ರೈಲು ಸೇವೆ ಪುನರಾಂಭದ ನಿರ್ಧಾರದಿಂದ ಹಿಂದೆ ಸರಿಯುವಂತೆ ಆಗ್ರಹಿಸಿದರು.

ಅತ್ಯಂತ ಹೆಚ್ಚು ಕೋವಿಡ್-೧೯ ಪ್ರಕರಣಗಳೂ ಇರುವ ಕೆಂಪು ವಲಯಗಳನ್ನು ಕಿತ್ತಳೆ ವಲಯವಾಗಿ ಮಾರ್ಪಡಿಸುವ ಅಥವಾ ಹಿಸುರ ವಲಯವಾಗಿ ಮಾರ್ಪಡಿಸುವ ಬಗ್ಗೆ ಮತ್ತು ವ್ಯವಸ್ಥಿತ ರೀತಿಯಲ್ಲಿ ಆರ್ಥಿಕ ಚಟುವಟಿಕೆಗಳನ್ನು ಹೆಚ್ಚಿಸುವ ಬಗ್ಗೆ ಪ್ರಧಾನಿ ಮೋದಿ ವಿಡಿಯೋ ಕಾನ್ಫರೆನ್ಸಿನಲ್ಲಿ ಮುಖ್ಯಮಂತ್ರಿಗಳ ಜೊತೆ ಚರ್ಚಿಸಿದರು.

ಮಂಗಳವಾರದಿಂದ ರೈಲು ಸೇವೆ ಪುನಾರಂಭವನ್ನು ವಿರೋಧಿಸಿದ ತೆಲಂಗಾಣ ಮುಖ್ಯಮಂತ್ರಿ ಕೆ ಚಂದ್ರಶೇಖರ ರಾವ್ ಅವರು ತಮಿಳುನಾಡು ಮುಖ್ಯಮಂತ್ರಿ ಪಳನಿಸ್ವಾಮಿ ಅವರ ನಿಲುವನ್ನು ಬೆಂಬಲಿಸಿದರು. ಉಭಯ ಮುಖ್ಯಮಂತ್ರಿಗಳ ಮಾತನ್ನು ಆಂದ್ರಪ್ರದೇಶದ ಮುಖ್ಯಮಂತ್ರಿ ಜಗನ್ ಮೋಹನ್ ರೆಡ್ಡಿ ಮತ್ತು ಛತ್ತೀಸ್ ಗಢದ ಮುಖ್ಯಮಂತ್ರಿ ಭೂಪೇಶ್ ಬಘೇಲ್ ಕೂಡಾ ಸಮರ್ಥಿಸಿದರು.

ರೈಲು ಸೇವೆ ಪುನಾರಂಭದಿಂದ ಸೋಂಕಿತರ ಪರೀಕ್ಷೆ, ಕ್ವಾರಂಟೈನ್ ಗೊಂದಲಮಯವಾಗಲಿದೆ ಎಂದು ಕೆಸಿಆರ್ ಹೇಳಿದರು. ಎಲ್ಲ ರಾಜ್ಯಗಳೂ ವ್ಯಾಪಕ ಹಣಕಸು ಸಂಕಷ್ಟದಲ್ಲಿವೆ. ಯಾವ ರಾಜ್ಯವೂ ಕೇಂದ್ರದ ಸಾಲವನ್ನು ತೀರಿಸಲು ಸಮರ್ಥವಾಗಿಲ್ಲ ಎಂದು ನುಡಿದ ತೆಲಂಗಾಣ ಮುಖ್ಯಮಂತ್ರಿ ರಾಜ್ಯಗಳು ಮರುಪಾವತಿ ಮಾಡಬೇಕಾದ ಸಾಲದ ಮರುಪಾವತಿಯನ್ನು ಮುಂದೂಡಬೇಕು ಎಂದು ಮನವಿ ಮಾಡಿದರು.

೬೭,೦೦೦ಕ್ಕೆ ಏರಿದ ಸೋಂಕು, ಚೇತರಿಕೆ ಪ್ರಮಾಣ ಶೇಕಡಾ ೩೧.೧೫

ಭಾರತದಲ್ಲಿ ಕೋವಿಡ್-೧೯ ಸೋಂಕಿನ ಪ್ರಕರಣಗಳು ಸೋಮವಾರ ೬೭,೧೫೨ಕ್ಕೆ ಏರಿದೆ. ಈ ಪೈಕಿ ೨೦,೯೧೭ಮಂದಿ ಗುಣಮುಖರಾಗಿದ್ದು, ಸಕ್ರಿಯ ಪ್ರಕರಣಗಳ ಸಂಖ್ಯೆ ೪೪,೦೨೯ ಎಂದು ಆರೋಗ್ಯ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಲವ ಅಗರವಾಲ್ ಹೇಳಿದರು.

ಕಳೆದ ೨೪ ಗಂಟೆಗಳ ಅವಧಿಯಲ್ಲಿ ೪,೨೧೩ ಹೊಸ ಸೋಂಕಿನ ಪ್ರಕರಣಗಳು ದಾಖಲಾಗಿದ್ದು, ಇದೇ ವೇಳೆಯಲ್ಲಿ ೧,೫೫೯ ಮಂದಿ ಗುಣಮುಖರಾಗಿದ್ದಾರೆ. ಹೀಗಾಗಿ ಚೇತರಿಕೆಯ ಪ್ರಮಾಣ ಶೇಕಡಾ ೩೧.೧೫ಕ್ಕೆ ಏರಿದೆ ಎಂದು ಅವರು ನುಡಿದರು.

ಕಳೆದ ೨೪ ಗಂಟೆಗಳ ಅವಧಿಯಲ್ಲಿ ೯೭ ಸಾವುಗಳು ವರದಿಯಾಗಿವೆ.

ಆರೋಗ್ಯ ಸೇತು ಆಪ್ ಬಳಕೆಯ ಮೂಲಕ ಕಳೆದ ಕೆಲವು ದಿನಗಳಲಿ ೧,೪೦,೦೦೦ ಸೋಂಕಿನ ಪ್ರಕರಣಗಳನ್ನು ಪತ್ತೆ ಹಚ್ಚಲಾಗಿದೆ. ೯.೮ ಕೋಟಿ ಸ್ಮಾರ್ಟ್ ಫೋನುಗಳಲ್ಲಿ ಆರೋಗ್ಯ ಸೇತು ಅಪ್ಲಿಕೇಷನ್ ಡೌನ್ ಲೋಡ್ ಮಾಡಲಾಗಿದ್ದು, ಮಂಗಳವಾರದಿಂದ ಈ ಆಪ್ ಜಿಯೋ ಸ್ಮಾರ್ಟ್ ಫೋನುಗಳಲ್ಲಿಯೂ ಲಭಿಸಲಿದೆ ಎಂದು ಎಂಪವರ್‍ಡ್ ಗ್ರೂಪ್ ೯ರ ಅಧ್ಯಕ್ಷ ಅಜಯ್ ಸಾಹ್ನಿ ಹೇಳಿದರು.

ವಿಶ್ವಾದ್ಯಂತ ಕೊರೋನಾವೈರಸ್ ಸೋಂಕಿvರು ೪೨,೧೮,೪೯೬, ಸಾವು ೨,೮೪,೭೬೫

ಚೇತರಿಸಿಕೊಂಡವರು- ೧೫,೦೬,೭೪೩

ಅಮೆರಿಕ ಸೋಂಕಿತರು ೧೩,೭೦,೪೩೩, ಸಾವು ೮೦,೮೬೨

ಸ್ಪೇನ್ ಸೋಂಕಿತರು ೨,೬೮,೧೪೩, ಸಾವು ೨೬,೭೪೪

ಇಟಲಿ ಸೋಂಕಿತರು ೨,೧೯,೦೭೦,  ಸಾವು ೩೦,೫೬೦

ಜರ್ಮನಿ ಸೋಂಕಿತರು ೧,೭೧,೯೯೯, ಸಾವು ೭,೫೬೯

ಚೀನಾ ಸೋಂಕಿತರು ೮೨,೯೧೮, ಸಾವು ೪,೬೩೩

ಇಂಗ್ಲೆಂಡ್ ಸೋಂಕಿತರು ೨,೨೩,೦೬೦, ಸಾವು ೩೨,೦೬೫

ಅಮೆರಿಕದಲ್ಲಿ ೭೫, ಇರಾನಿನಲ್ಲಿ ೪೫, ಬೆಲ್ಜಿಯಂನಲ್ಲಿ ೫೧, ಸ್ಪೇನಿನಲ್ಲಿ ೧೨೩, ನೆದರ್ ಲ್ಯಾಂಡ್ಸ್‌ನಲ್ಲಿ ೧೬, ರಶ್ಯಾದಲ್ಲಿ ೯೪, ಸ್ವೀಡನ್‌ನಲ್ಲಿ ೩೧, ಮೆಕ್ಸಿಕೋದಲ್ಲಿ ೧೧೨, ಇಂಗ್ಲೆಂಡಿನಲ್ಲಿ ೨೧೦ ಒಟ್ಟಾರೆ ವಿಶ್ವಾದ್ಯಂತ ೧,೦೩೧ ಮಂದಿ ಒಂದೇ ದಿನ ಸಾವನ್ನಪ್ಪಿದ್ದಾರೆ.

ಇಂದಿನಿಂದ ಹಲವಡೆಗಳಿಗೆ ರೈಲು ಸಂಚಾರ ಪುನಾರಂಭ

ಇಂದಿನಿಂದ ಹಲವಡೆಗಳಿಗೆ ರೈಲು ಸಂಚಾರ ಪುನಾರಂಭ

ನವದೆಹಲಿ: ಕೊರೋನಾವೈರಸ್ ಪ್ರಸರಣ ತಡೆಯುವ ಸಲುವಾಗಿ ಸ್ಥಗಿತಗೊಳಿಸಲಾಗಿದ್ದ ರೈಲು ಸಂಚಾರವನ್ನು   ಭಾರತೀಯ ರೈಲ್ವೆಯು ಒಂದೂವರೆ ತಿಂಗಳ ಬಳಿಕ  2020 ಮೇ ೧೨ರ ಮಂಗಳವಾರ ಪುನಾರಂಭ ಮಾಡಲಿದೆ. ಮೇ ೧೭ರಂದು ರಾಷ್ಟ್ರವ್ಯಾಪಿ ದಿಗ್ಬಂಧನ (ಲಾಕ್ ಡೌನ್) ಅಂತ್ಯಗೊಳ್ಳಲಿದ್ದು, ಅದಕ್ಕೂ ಮುನ್ನವೇ ರೈಲು ಸೇವೆ ಪುನಾರಂಭಕ್ಕೆ ರೈಲ್ವೇ ಇಲಾಖೆ ನಿರ್ಧರಿಸಿತು.

ಕೊರೋನಾವೈರಸ್ ಸೋಂಕು ಪ್ರಸರಣ ತಡೆಯುವ ಸಲುವಾಗಿ ಮಾರ್ಚ್ ಮಾಸಾಂತ್ಯದಲ್ಲಿ ರಾಷ್ಟ್ರವ್ಯಾಪಿ ದಿಗ್ಬಂಧನ ಘೋಷಿಸಲಾಗಿತ್ತು. ಮಾರ್ಚ್ ೨೨ರಿಂದ ಎಲ್ಲಾ ಪ್ರಯಾಣಿಕ ರೈಲು ಸಂಚಾರವನ್ನು ಸ್ಥಗಿತಗೊಳಿಸಲಾಗಿತ್ತು.

ಮಂಗಳವಾರದಿಂದ ಪ್ರತಿದಿನ ೧೫ ರೈಲುಗಳು ಸಂಚಾರ ನಡೆಸಲಿವೆ. ಈ ವಿಶೇಷ ರೈಲುಗಳು ನವದೆಹಲಿಯಿಂದ ದಿಬ್ರುಗಢ, ಅಗರ್ತಲ, ಹೌರಾ, ಪಾಟ್ನಾ, ಬಿಲಾಸಪುರ, ರಾಂಚಿ, ಭುವನೇಶ್ವರ, ಸಿಕಂದರಾಬಾದ್, ಬೆಂಗಳೂರು, ಚೆನ್ನೈ, ತಿರುವನಂತಪುರಂ, ಮಡಗಾಂವ್, ಮುಂಬೈ ಸೆಂಟ್ರಲ್, ಅಹಮದಾಬಾದ್ ಮತ್ತು ಜಮ್ಮು-ತಾವಿಗೆ  ಸಂಚರಿಸಲಿದೆ. ಈ ರೈಲುಗಳು ಕೆಲವು ಕಡೆ ಮಾತ್ರ ನಿಲುಗಡೆಯಾಗಲಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದರು.

ಈ ವಾರದಲ್ಲಿ ಹವಾನಿಯಂತ್ರಿತ ರೈಲು ಸೇವೆ ಆರಂಭವಾಗಲಿದೆ. ಟಿಕೆಟ್ ದರ ರಾಜಧಾನಿ ಎಕ್ಸ್ ಪ್ರೆಸ್‌ನ ದರಕ್ಕೆ ಸಮಾನಾಂತರವಾಗಿರಲಿದೆ ಎಂದು ರೈಲ್ವೆ ಸಚಿವಾಲಯ ತಿಳಿಸಿದೆ. ಸೋಮವಾರ ಸಂಜೆ ೪ಗಂಟೆಯಿಂದ ರೈಲ್ವೆ ಟಿಕೆಟ್ ಬುಕ್ಕಿಂಗ್ ಆರಂಭ ಎಂದು ವರದಿ ಹೇಳಿತು.

ಪ್ರಯಾಣಿಕರು ಐಆರ್‌ಸಿಟಿಸಿ ವೆಬ್ ಸೈಟ್ ಅಥವಾ ಐಆರ್‌ಸಿಟಿಸಿ ಮೊಬೈಲ್ ಆಪ್ ಮೂಲಕ ಮಾತ್ರ ಟಿಕೆಟ್ ಖರೀದಿಸಬೇಕು. ರೈಲ್ವೆ ನಿಲ್ದಾಣಗಳಲ್ಲಿನ ಟಿಕೆಟ್ ಬುಕ್ಕಿಂಗ್ ಕೌಂಟರ್ ಬಂದ್ ಮುಂದುವರೆದಿದೆ. ಅಲ್ಲದೇ ತತ್ಕಾಲ್ ಮತ್ತು ಪ್ರೀಮಿಯಂ ತತ್ಕಾಲ್ ಟಿಕೆಟ್ ಬುಕ್ ಮಾಡುವ ಅವಕಾಶ ಇಲ್ಲ ಎಂದು ಅಧಿಕಾರಿಗಳು ತಿಳಿಸಿದರು.

ಟಿಕೆಟ್ ಕನ್ ಫರ್ಮ್ ಆದ ಪ್ರಯಾಣಿಕರನ್ನು ಮಾತ್ರ ರೈಲ್ವೆ ನಿಲ್ದಾಣದೊಳಕ್ಕೆ ಬಿಡಲಾಗುವುದು. ಫ್ಲ್ಯಾಟ್ ಫಾರಂ ಟಿಕೆಟ್ ಕೊಡುವುದಿಲ್ಲ. ಎಲ್ಲಾ ಪ್ರಯಾಣಿಕರು ಕಡ್ಡಾಯವಾಗಿ ಮುಖಗವಸು (ಮಾಸ್ಕ್) ಧರಿಸಬೇಕು, ನಿಲ್ದಾಣದಲ್ಲಿ ಟೆಂಪರೇಚರ್ ಸ್ಕ್ರೀನಿಂಗ್ ಕಡ್ಡಾಯ. ರೈಲ್ವೆ ನಿಲ್ದಾಣಕ್ಕೆ ಒಂದು ಗಂಟೆ ಮುನ್ನ ಆಗಮಿಸಬೇಕು ಎಂದು ಅಧಿಕಾರಿಗಳು ವಿವರಿಸಿದರು.

ಇತರ ಹೊಸ ಮಾರ್ಗಗಳಲ್ಲಿಯೂ ವಿಶೇಷ ರೈಲು ಸಂಚಾರ ಕೂಡಲೇ ಆರಂಭಿಸಲಾಗುವುದು. ಕೋವಿಡ್ ೧೯ ಕೇರ್ ಸೆಂಟರಿಗಾಗಿ ೨೦ ಸಾವಿರ ಬೋಗಿಗಳನ್ನು ಬಳಸಿಕೊಳ್ಳಲಾಗಿದೆ. ಈ ಹಿನ್ನೆಲೆಯಲ್ಲಿ ಪ್ರತಿದಿನ ೩೦೦ ರೈಲುಗಳು ಮಾತ್ರ ಕಾರ್ಯಾಚರಿಸಲು ಸಾಧ್ಯತೆ ಇದೆ ಎಂದು ವರದಿ ತಿಳಿಸಿತು.