ಅಮೆರಿಕ ಸ್ಥಳೀಯ ಚುನಾವಣೆಯಲ್ಲಿ ಕನ್ನಡಿಗನಿಗೆ ಜಯ

ಅಮೆರಿಕ ಸ್ಥಳೀಯ ಚುನಾವಣೆಯಲ್ಲಿ ಕನ್ನಡಿಗನಿಗೆ ಜಯ

ವಾಷಿಂಗ್ಟನ್​:  ಕನ್ನಡಿಗ ಸೇರಿ ಭಾರತದ ನಾಲ್ವರು ಅಮೆರಿಕ ಸ್ಥಳೀಯ ಚುನಾವಣೆಯಲ್ಲಿ ಗೆದ್ದು ಇತಿಹಾಸ ನಿರ್ಮಿಸಿದರು. ಇವರಲ್ಲಿ ಮುಸ್ಲಿಂ ಮಹಿಳೆಯೂ ಸೇರಿರುವುದು ವಿಶೇಷ.

ಬೆಂಗಳೂರು ಮೂಲದ ಸುಹಾಸ್​ ಸುಬ್ರಮಣ್ಯಂ, ಭಾರತ ಮೂಲದ ಗಜಾಲಾ ಹಶ್ಮಿ ವರ್ಜಿನಿಯಾ ಸ್ಟೇಟ್​​ ಸೆನೆಟ್​ ಚುನಾವಣೆಯಲ್ಲಿ ಗೆದ್ದು ಬೀಗಿದರು. ಸುಹಾಸ್​ ತಾಯಿ ಬೆಂಗಳೂರು ಮೂಲದವರಾಗಿದ್ದು, 1979ರಲ್ಲಿ ಅಮೆರಿಕಕ್ಕೆ ತೆರಳಿದ್ದರು. ನಂತರ ವೈದ್ಯರಾಗಿ ಅವರು ಸೇವೆ ಸಲ್ಲಿಸಿದ್ದರು. ಬರಾಕ್​ ಒಬಾಮಾ ಅಧಿಕಾರಾವಧಿಯಲ್ಲಿ ಸುಹಾಸ್ ವೈಟ್​ಹೌಸ್​ನಲ್ಲಿ​ ತಂತ್ರಜ್ಞಾನ ನೀತಿ ನಿರ್ದೇಶಕರಾಗಿ ಕಾರ್ಯ ನಿರ್ವಹಿಸಿದ್ದರು. ಈ ವೇಳೆ ಕೆಲ ಪ್ರಮುಖ ಜವಾಬ್ದಾರಿಗಳನ್ನು ನಿರ್ವಹಿಸಿದ್ದರು.

ಗಜಾಲಾ ಭಾರತ ಮೂಲದವರಾಗಿದ್ದು, ಕಾಲೇಜ್​ ಪ್ರೊಫೆಸರ್​ ಆಗಿ ಸೇವೆ ಸಲ್ಲಿಸಿದ ಅನುಭವ ಹೊಂದಿದ್ದಾರೆ. ವರ್ಜಿನಿಯಾ ಸ್ಟೇಟ್​ ಸೆನೆಟ್​ಗೆ ಆಯ್ಕೆಯಾದ ಮೊದಲ ಮುಸ್ಲಿಂ ಮಹಿಳೆ ಎನ್ನುವ ಖ್ಯಾತಿಗೆ ಅವರು ಪಾತ್ರರಾದರು.

ಗೆದ್ದ ನಂತರ ಮಾತನಾಡಿದ ಗಜಾಲಾ, “ಈ ಗೆಲುವು ನನ್ನೊಬ್ಬಳದ್ದೇ ಅಲ್ಲ. ವರ್ಜಿನಿಯಾದಲ್ಲಿ ಸಾಕಷ್ಟು ಬದಲಾವಣೆ ಮಾಡಬೇಕಿದೆ. ಅದನ್ನು ನಾವು ಮಾಡುತ್ತೇವೆ,” ಎಂದು ಹೇಳಿದರು. ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಡೊನಾಲ್ಡ್​​ ಟ್ರಂಪ್​ ಎದುರು ಸ್ಪರ್ಧಿಸಿದ್ದ ಹಿಲರಿ ಕ್ಲಿಂಟನ್​ ಅವರು ಗಜಾಲಾಗೆ ಟ್ವಿಟ್ಟರ್​ನಲ್ಲಿ ಅಭಿನಂದನೆ ಸಲ್ಲಿಸಿದರು.

ಕ್ಯಾಲಿಫೋರ್ನಿಯಾದಲ್ಲಿ ಮೊನೋ ರಾಜ್​ ಹಾಗೂ ಉತ್ತರ ಕರೋಲಿನಾದ ಡಿಂಪಲ್​ ಅಜ್ಮೆರಾ ಕೂಡ ಸ್ಥಳೀಯ ಚುನಾವಣೆಯಲ್ಲಿ ಗೆದ್ದಿದ್ದು ಇವರು ಕೂಡ ಭಾರತ ಮೂಲದವರು.